Salmos 58 - Qheshwa Biblia DC

Cheqan kajta mañakunamanta

¹ Qankunaqa atiyniyojkuna, cheqachu cheqanta kamachinkichej? Cheqa kajman jinachu ruwankichej?

² Mana jinachu, astawanqa sajra yuyaywan ruwankichej, sonqoykichejpi sajra imasta wakichispa, llajtata ch'ajwachinkichej.

³ Sajra runasqa mamankoj wijsanmantapacha sajrapuni kanku. Nacekusqankumantapacha runasqa llullata parlaspa, cheqan ñanmanta pantankuña.

⁴ Kataris jina venenoyoj kanku. Joq'araman tukoj sierpe kataris jina kanku.

⁵ Layqaj tonadasnintapis mana uyarinampaj, may sumaj yachaj kashajtimpis.

⁶ Diosníy, kirusninta p'akiray, chay león uñaspa colmillosninta p'akiray.

⁷ Suroj yaku jina chinkachunku. Ñampi qhora jina ch'akichunku.

⁸ Ch'uru khuru jina llausampi chinkachunku. Wañusqa sullu wawa jina ama k'anchayta rikuchunkuchu.

⁹ Manaraj reparakushajtinku khishkas jina ruphaykuchunku. Q'omer qhora jinataj t'irasqas kachunku.

¹⁰ Diosta yuyajkuna kusikonqanku sajra runata jasut'isqata rikuspa. Chakisnintataj yawarninkupi ch'aranchakonqa.

¹¹ Chaypachataj nenqanku: Walejpuni Diosta qhatikoyqa. Uj Dios tiyan, kay pachata cheqanchaj.