Salmos 57 - Qheshwa Biblia DC

Señorpa yanapayninta mañakunamanta

¹ Khuyakuway noqamanta, Diosníy. Khuyakullaway. Qampi pakakuyta mask'ani. Lijrasniyki urapi pakakuyta munani, chay jina llakiy pasanankama.

² Patapi kaj Diosmanta mañakusaj, tukuy imapi yanapawaj Diosmanta.

³ Pay janaj pachamanta munakuyninta apachimuwanqa, cheqa kaynintawan. Phiñakuspa qhatiykachawajkunamantataj salvawanqa.

⁴ Kausaynenqa leones chaupipi kashan. Ninata wijch'oj runaspa chaupimpi wijch'usqa kashani. Kirusninkoqa lanzas jina, flechas jinataj. Qallunkutaj filochasqa espada jina.

⁵ Diosníy, qan janaj pachamanta aswan pataman oqharisqa kanki. K'anchayniykitaj tukuy kay pachaman junt'an.

⁶ Uj ch'ipata enemigosniy purinayman churanku, chaywan kallpay pisiyanampaj. Ñan purinaypi uj t'oqota ruwarqanku, paykunallataj chaypi urmarqanku.

⁷ Sonqoyqa wakichisqa kashan, Diosníy, takiykunata takipusunaypaj.

⁸ Rijch'ariy ari, almáy, rijch'ariy arpa, guitarra. Sut'iyamuyta rijch'arisaj.

⁹ Takiykunawan yupaychasqayki Señor, tukuy ayllus ukhupi, naciones ukhupi ima.

¹⁰ Munakuyniykeqa janaj pachakama chayan, cheqan kayniykitaj phuyuskama chayan.

¹¹ Diosníy, janaj pachamanta aswan patapi kanki. K'anchayniykitaj kay pachata junt'an.