Salmos 56 - Qheshwa Biblia DC

Diospi atienekunamanta

¹ Khuyakuway noqamanta, Diosníy, mikhuykunawankupaj jina, qhatiyachawaj runas tiyan. Sapa p'unchay maqaspa ñak'arichiwanku.

² Enemigosniy qhatiykachawanku. Ashkha kanku wapuykachaspa maqawajkunaqa.

³ Manchachikuspa qanllapi atienekuyki.

⁴ Diospi atienekuni, parlasqantataj yupaychani. Diospi atienekuni, manataj manchachikunichu. Imatataj runaqa ruwawanman kasqari?

⁵ Tuta p'unchay parlasqankuwan nanachiwanku. Sajrata ruwayllapi yuyanku.

⁶ Tantakuspa kaypi jaqaypi pakaykachakunku, purisqayta allinta wateqawanku, mayk'ajchus wañuchinawankuta suyaspa.

⁷ Atinkumanchu sajra kaynillankumantataj ayqeyta? Diosníy, phiñakusqaykiwan llajtasta k'umuykachachiy.

⁸ Qan yupashanki mashkha kutistachus ayqekusqaykita, sapa waqayniyta qan jap'inki. Manachu libroykipi qelqasqa kashan?

⁹ Enemigosneyqa ayqeyta qallarerqanku, noqa yanapata mask'akusojtiy. Noqa sumajta yachani, Dios noqaman kutikuwasqanta.

¹⁰ Diospi atienekuni, parlasqantataj yupaychani. Señorpi atienekuni parlasqantataj yupaychani.

¹¹ Diospi atienekuni, mana manchachikunichu. Imatataj runaqa ruwawanman kasqari?

¹² Ruwasaj nisqasuyta junt'asqayki, Diosníy; yupaychasuspa junt'asqayki,

¹³ wañuymanta salvawasqaykirayku. Urmanaymanta librawarqanki, chaywan kausay k'anchaypi purinaypaj, Diospa ñaupaqempi.