Salmos 54 - Qheshwa Biblia DCDiosmanta yanapata mañakuna [Cuerdasniyoj tocanaswan takinapaj Davidpa yarawin. Zifeos Saulman jamuspa nerqanku: Manachu David jallp'anchejpi pakasqa kashan?, nispa chaypacha.] 1 Sutiykirayku salvaway, Diosníy. Atiyniykiwantaj jark'away. 2 Uyariway, Diosníy, mañakususqayta. Parlasusqayta uyarillaway. 3 Wapu wapu jatunchakojkuna runas, contraypi jatarispa wañuchiyta munawanku. Paykunaqa mana jayk'ajpis Diosmanta yuyarikunkuchu. 4 Noqatataj Diosniy yanapawan. Kausayta Señorqa qollawampuni. 5 Pay enemigosniypa sajra kayninta, paykunallamantaj kutichenqa. Paykunata chinkachiy, cheqan sonqoyoj Señor. 6 Noqataj sonqoypa nisqanman jina, uywa wañuchisqasta jaywasqayki, sutiykitataj k'acha kasqaykirayku yupaychasaj. 7 Tukuy llakiyniymanta librawarqanki. Enemigosniytataj atipasqata rikuni. |
Qheshwa Biblia DC © Sociedades Bíblicas Unidas, 1986.
United Bible Societies