Salmos 52 - Qheshwa Biblia DCSajra runaj yanqha jatunchakuynin [Kay takeyqa Davidpa yarawin, edomita Doeg Saulman willashajtin, David Ahimelecpa wasinman jamusqa nispa chaypacha qelqarqa.] 1 Imaraykutaj sajra kayniykimanta jatunchakunki, atiyniyoj runa? Diospa khuyakuynenqa kallampuni. 2 Sajra ruwayllapipuni qanqa yuyanki. Qalluykeqa sumaj khuchoj cuchillo jina ch'aukiyan. 3 Astawan munanki sajrata ruwayta, allin ruwaymantaqa llullakuyta munanki, cheqanta parlaymantaqa. 4 Llulla simi, qan munakunki tukuy laya ch'ichi palabrasta. 5 Chayrayku Diosqa wiñaypaj pampachasonqa, wasiykimanta jap'isuspa wijch'usonqa, kay pachamanta chinkachisonqa. 6 Diosta kasukojkuna kayta rikuspa manchachikonqanku, kusipayanqankutaj chay runata, nispa: 7 Qhawaychej ari Diospi pakakuyta mana mask'aj runata, payqa kapuynillampi atienekorqa, sajra kaynillampitaj sayarqa. 8 Noqaqa q'omer olivo jina, Diospa wasimpi kani. Diospa munakuynimpi noqaqa wiñaypaj suyasajpuni. 9 Ruwasqasniykimanta, Diosníy, agradecekusqaykipuni. Noqaqa munakusojkunaj chaupimpi qampi suyakusqayki, k'acha kasqaykirayku. |
Qheshwa Biblia DC © Sociedades Bíblicas Unidas, 1986.
United Bible Societies