Salmos 51 - Qheshwa Biblia DC

Perdonta mañakunamanta

¹ Munakuwasqaykirayku, Diosníy, khuyakuway. Khuyaj sonqo kasqaykiwantaj, tukuy juchasniyta pampachay.

² Sajra kayniyta mayllaway. Juchasniymanta llimphuchaway.

³ Noqa sajra kasqayta reparakuni, juchasniymanta yuyarikunipuni.

⁴ Contraykipi juchallikorqani, ñaupaqeykita mana allin kajta ruwaspa. Chayrayku nisqaykeqa cheqan. Cheqanchaspaqa mana pantankichu.

⁵ Paqarikusqaymantapacha sajra kani. Mamaypa wijsanmantapacha sajra kani.

⁶ Qanqa cheqan sonqoyoj runata munakunki. Sonqoypitaj yachachiwarqanki.

⁷ Hisopowan mayllaway, llimphu sonqoyojtaj kasaj. Mayllaway Señor, rit'imanta aswan yurajtaj kasaj.

⁸ Señor, jatun kusikuywan junt'achiway. Llakiywan lastachiwarqanki chaypis, watejmanta kusichiway.

⁹ Juchasniymanta uyaykita pakakuy. Tukuy sajra ruwasqasniytataj pampachay.

¹⁰ Diosníy, llimphu sonqota qoway. Ukhuypi cheqan espirituta mosojyachiy.

¹¹ Ama qanmanta karunchawaychu, amataj Santo Espirituykita qhechuwaychu.

¹² Watejmanta rikuchiway salvacionniykimanta kusikuyta. K'acha espirituyojta sayachiway,

¹³ sajra runasman yachachinaypaj, sajra kayniykumanta kutirikusunaykupaj.

¹⁴ Librayway runata wañuchiymanta. Diosníy, salvaway Diosníy. Noqataj takispa willasaj, cheqan sonqoyoj kasqaykita.

¹⁵ Señor, simiyta kichariy, chay simiywantaj qanta yupaychasqayki.

¹⁶ Mana qanqa uywa ñak'asqasta jaywanata munankichu, nitaj uywata q'olachipusunaytapis.

¹⁷ Diosmanqa pesachikoj sonqota jaywana. Qanqa Diosníy, llakiymanta t'unasqa sonqota, mana qhesachankichu.

¹⁸ Allinta Sionman ruway, k'acha munakuyniykirayku. Watejmanta oqharillaytaj Jerusalempa perqasninta.

¹⁹ Chaymantaraj jap'ikunki cheqan kaj jaywasqasta, uywasta, waj jaywanas tukuynin q'olasqasta. Chaypacha altarniyki patapi novillosta jaywasonqanku.