Salmos 50 - Qheshwa Biblia DC

Dios kay pachata cheqanchanqa

¹ Dioskunaj Diosnin Señorqa parlan. Inti llojsimuy cheqamanta inti yaykuy cheqankama, tukuy kay pachapi tiyakojkunata wajyan.

² May sumaj k'achitu Sión llajtamantapacha Diosqa lliphipishan.

³ Diosninchejqa mana ch'inllamantachu jamushan. Ñaupaqenta sinch'i q'olaj nina jamushan. Muyuynintataj sinch'i para jamushan.

⁴ Janaj pachamanta Diosqa cielota, jallp'atapis wajyan, ayllun cheqanchasqa kasqanta rikunankupaj.

⁵ Noqata qhatiwajkunata tantaychej, uywa wañuchisqata jaywawaspa tratota ruwawajkunata.

⁶ Janaj cielorí willan Diosqa k'acha, cheqantaj kasqanta, imaraykuchus Diosqa juezmin.

⁷ Israel ayllúy, uyariway. Tukuy imata qanwan contraykita sut'ita parlasaj. Noqa Dios kani, Diosniykitaj.

⁸ Mana uywa wañuchisqata jaywawasqaykimantachu k'amiyki. Uywastaqa jaywashallawankipuni, altar patapi q'olachispa.

⁹ Mana uña torostachu mañakuyki, nitaj chivostachu.

¹⁰ Tukuy k'ita animalesqa noqaypata, jinallataj orqospi animalespis.

¹¹ Orqospi kaj montepi kaj p'isqospis noqaypata, tukuy pampa khuruspis noqajta.

¹² Yarqhawanman chayqa, mana willaykimanchu, imaraykuchus tukuy mundo noqajta, tukuy imantin.

¹³ Toro aychatachu mikhuni, chayri chivo yawartachu ujyani?

¹⁴ Diosman uywa wañuchisqata jaywasqaykeqa agradecekusqayki kachun, patapi kaj Diosman junt'ay.

¹⁵ Llakiy p'unchaypi wajyakuway, noqa librasqayki, qantaj jatunchawanki.

¹⁶ Sajra kajtaqa Dios nin: Imaraykutaj qan kamachisqasniymanta parlanayki tiyanri? Imaraykutaj trato ruwasqaytapis ninayki tiyanri?

¹⁷ K'amisqayta qanqa mana jap'ikunkichu, nitaj parlasqaymantapis dakunkichu.

¹⁸ Suwataqa ojllaykunaykipaj suyanki, khuchi runawantaj kausakunki.

¹⁹ Sajrata parlanaykipaj llullakunaykipajwan qalluykita kacharinki.

²⁰ Mana kajmanta wauqeykita ch'atanki, kikin ñuñoj masi wauqeykiwan churanakunki.

²¹ Tukuy kayta qan ruwanki, noqataj ch'inlla karqani. Yuyarqanki noqaqa qan jina kasqayta. Kunanqa noqa uyanchasqayki. Cuentatataj mañasqayki.

²² Kunanqa, reparakuychej, Diosta qonqapojkuna. Pajtataj noqa qankunata t'isayta qallariykichejman, chantaqa nitaj pipis librayta atishasunkichejmanchu.

²³ Pichus agradecekuwajqa noqata jatunchawan chayqa munakuwan, ñanniymanta mana t'aqakojtataj noqa salvani.