Salmos 5 - Qheshwa Biblia DC

Rijch'arispa mañakunamanta

¹ Diosníy, uyariway mañakususqayta, reparay waqakusqayta.

² Qanmanta qhaparikamusqayta uyariway reyníy, Diosníy, imaraykuchus qanmanta mañakuyki.

³ Señorníy, sut'iyaymanta mañakusqayta uyariwanki; chhapu chhaputa qanman willakuyki; chantá suyani imatachus ninawaykita.

⁴ Qanqa mana sajra kajwan kusikoj Dioschu kanki; sajra runasqa qanwan mana tiyakunkumanchu.

⁵ Jatunchakojkunaqa mana ñaupaqeykipi sayayta atinkumanchu; qanqa chejnikunki sajrata ruwajkunata.

⁶ Qan llullasta chinkachinki; puraj uya runa wañuchita qanqa qhesachanki.

⁷ Noqaqa mayta munakuwasqaykirayku wasiykiman yaykuyta atini. Chay santo wasiykita qhawaspa, qanman tukuy sonqo qonqorikuni.

⁸ Enemigosniyrayku, Señor, cheqan ruwayniykiman jina purichiway, cheqan ñanniykitataj pusaway.

⁹ Paykuna llullakullankupuni. Sonqonkupeqa sajrallata yuyanku. Mallq'ankoqa kicharisqa sepultura jina, misk'ita parlaspapis mana cheqantachu ninku.

¹⁰ Diosníy, paykunata wanachiy ari: imatachus yuyasqankuta pantachiy: anchata juchallikusqankurayku, ñaupaqeykimanta qharqoy; imaraykuchus contraykipi oqharikorqanku.

¹¹ Kusikuchunku qanman k'askaykojkuna; kusisqaspuni kachunku qan paykunata waqaychasqaykirayku. Munakusojkunaqa qanrayku kusikunku.

¹² Señor, qan bendicinki cheqan ruwajta. Munakuyniykeqa jark'akuna jina payta waqaychan.