Salmos 49 - Qheshwa Biblia DC

Qolqepi atienekoyqa qhasilla

¹ Kayta allinta uyariychej, tukuy llajtas, mundontimpi kaj runas,

² pisi yachayniyojkuna, yachayniyojkuna, qhapajkuna, wajchas ima.

³ Noqa yachaywan parlasaj. Sonqoy ukhupi yuyasqayta yachaywan willasaj.

⁴ Sumajta uyarisaj imasmarista, sonqoypi pakasqa kajta arpaj waqayninwan sut'inchasaj.

⁵ Imaraykutaj manchachikuyman, sajra p'unchaykuna jamojtin?

⁶ Paykuna qhapaj kayninkupi atienekunku, ashkha kapuyninkumantataj alabakunku.

⁷ Chaywampis, mana pipis payllamanta wauqenta salvayta atinmanchu, nitaj Diosman pagayta atinmanchu, kausayninta salvanampajqa.

⁸ Mana jayk'ajpis qolqe kanmanchu, runaj kausayninta rantinapajqa,

⁹ wiñaypaj Kausanallampajpuni, wañuytataj mana rikunampaj.

¹⁰ Rikukun ari, tukuypis ujrejllata wañunku, yachayniyojkunapis, wampuspis. Kapuyninkutaj wajkunapaj qhepakapun.

¹¹ Jallp'asninkumampis sutisninkuta churachunku. Sepulturankoqa wiñaypaj wasinku kanqa; chaypitaj wiñaypaj qhapakonqanku.

¹² Runaqa may jina qhapajpis tukukuyniyojpuni. Uywas jinallataj wañupun.

¹³ Ajinata tukukunku paykunallapi atienekojkunaqa. Ajinapi tukukunku paykunallamanta alabakojkunaqa.

¹⁴ Chay runasta wañoyqa michej jina sepulturaman pusan, ovejaspis kankuman jina. Sut'iyamojtintaj, cheqan runasqa paykunata kamachenqanku. Sajra runaspa kallpankoqa tukukaponqa, sepulturataj wasinku kanqa.

¹⁵ Dios noqataqa wañuymanta atiyninmantawan librawanqa, paytaj pusakapuwanqa.

¹⁶ Ama pipis qhapajyajtenqa llakikuychu, aswan k'achituman wasinta tukuchejtimpis.

¹⁷ Wañuspaqa, mana imatapis apanqachu, nitaj k'acha kapuynimpis sepulturamanqa qhepanta renqachu.

¹⁸ Kusisqapis kausaynimpi kachun, runas qhapaj kasqanrayku alabajtinkupis.

¹⁹ Uj día paypaj wañunan chayamonqa, manañataj p'unchayta ujtawan rikonqachu.

²⁰ Runaqa allimpaj qhawasqapis mana wiñaypaj kausayniyojchu, ancha qhapajpis kachun; uywas jinallataj wañun.