Salmos 48 - Qheshwa Biblia DC

Sionqa Señorpa k'acha llajtan

¹ Señorqa jatun. Diosninchejqa yupaychanapaj jinapuni, llajtampi Santo orqompiwan.

² Diospa Sión orqonqa jatun, k'achitutaj. Jaqay pata ladopi kusikuy kashan. Sión orqoqa kusikuy tukuy kay pachapaj, chayqa jatun reypa llajtan.

³ Diosqa Jerusalén palaciompi kashan, Diosninchejqa rejsichikun, paypi sumaj pakakuna kasqanta.

⁴ Reyesta tantakorqanku, contrampi tukuyninku rinankupaj.

⁵ Llajtata rikuspataj t'ukorqanku, manchachikuspataj ayqerqanku.

⁶ Chay kikimpi manchachikuywan jap'ichikorqanku, onqokunan horapi warmi nanaywan q'ewichikun jinata.

⁷ Imaynatachus wayra inti llojsimuynejmanta wayramuspa, Tarsis barcosta p'akin, ajinata.

⁸ Tukuy Atiyniyoj Señor Diosninchejpa llajtampi, ñawisninchejwan rikorqanchej imatachus willawarqanchej chayta. Jerusalentaqa Diosninchej sinch'ita wiñaypaj sayachenqa.

⁹ Diosniyku, wasiyki ukhupi khuyakuwasqaykupi yuyayku.

¹⁰ Diosníy, tukuynejpi yupaychasqa kanki, jatun sutiykiman jina. Qan justiciata ruwanki atiyniykiwan.

¹¹ Sión orqoqa kusikuchun. Tukuy Judá llajtaspis kusikuywan phinkiykachachunku, cheqanta ruwasqaykimanta.

¹² Sionta muyumuychej, torresninta yupaspa.

¹³ Qhawaychej perqasninta. Rikuychej jatun wasisninta, qhepata jamojkunaman willayta atinaykichejpaj,

¹⁴ Diosqa wiñaypa wiñaynimpaj Diosninchej kasqanta. Pay wiñaypaj pusawasunchej.