Salmos 44 - Qheshwa Biblia DC

Diospa yanapayninta mañakunamanta

¹ Diosníy, ningrisniykuwan uyariyku, tatasniyoj siminkumanta, unay watas paykuna kausashajtinku ruwasqasniykimanta.

² Makillaykiwantaj wijch'orqanki, mana qampi yuyaj runasta. Nacionesta ñak'aricherqanki, tatasniykutataj chayman tiyacherqanki.

³ Manamin makinkuchu nitaj espadankuchu paykunata atipacherqa jallp'ata jap'inankupaj. Manachayqa qampa atiyniyki, kallpayki, qhawaykachayniyki ima, atipacherqa tatasniykuta munakusqaykirayku.

⁴ Qan Diosníy, reyníy, aylluykita atipacherqanki.

⁵ Qanrayku enemigosniykuta atiparqayku. Chejnikuwajkunata sutiykipi ñat'orqayku.

⁶ Noqa mana armasniypichu atienekuyman, espadaypis mana atipachiwanmanchu.

⁷ Qanmin enemigosniykutaqa atipachiwayku. Chejnikuwayku chaykunataqa qanmin p'enqayman churarqanki.

⁸ Señor qanmanta sapa p'unchay jatunchakuyku. Qan Diosniykutataj wiñaypaj yupaychasqayku.

⁹ Qantaj qhesachawayku, p'enqaypitaj churawayku, manañataj soldadosniykuwan llojsinkichu.

¹⁰ Enemigosniykuwan ayqechiwarqayku. Chejnikuwayku chaykunaqa suwawayku, munasqankumantaj apawayku.

¹¹ Qanqa jaywawarqayku, wañuchinapaj ovejaspis kaykuman jina, ch'eqerachiwarqaykutaj Diospi mana creej naciones ukhuman.

¹² Yanqhallata aylluykitaqa venderparinki, vendespataj ni imatapis tarinkichu.

¹³ Toreanawaykupaj jina qan churawarqayku, muyuyniykupi kajkuna asipayanawaykupaj, p'enqaypitaj qhawachinawaykupaj.

¹⁴ Diospi mana creejkunaj asipayananta ruwawarqayku. Noqaykuta rikuspataj asipayaspa umankuta khiwinku.

¹⁵ Sapa p'unchay k'umuykachachisqallapuni kakuni. P'enqaywan mana maymampis umayta churayta atinichu,

¹⁶ enemigoypa juchanrayku, pay qhesachawasqanrayku, jatunmanta qhapariwasqanrayku. Phiñakuspa qhasimanta ch'ataykuwasqanraykutaj.

¹⁷ Kay imasqa mana qanta qonqasqaykuraykuchu jamuwayku, nitaj tratoykita p'akisqaykuraykuchu.

¹⁸ Mana saqerpariytaqa yuyarqaykuchu. Ñankunasniykitapis mana saqerqaykuchu.

¹⁹ Chaywampis, qan ch'in q'ara pampapi ñat'urpariwayku; wañuy llanthuwantaj qhataykuwayku.

²⁰ Qan Diosniykutachus qonqaykuman karqa, waj dioskunatatajchus yupaychaykuman karqa chayqa,

²¹ manachu chayta yachaspa phiñakuwaj karqa? Qanqa sonqoyku ukhupi pakasqa kajtapis yachankipuni.

²² Qanraykutaj sapa p'unchay wañuchisqas jina kayku, yupasqastaj ñak'ana ovejas jina.

²³ Rijch'ariy ari; imaraykutaj puñullanki Señor? Rijch'ariy ari. Ama wiñaypajqa karunchakuwaykuchu.

²⁴ Imaraykutaj pakakuwayku? Qonqapunkitaj llakiyniykumanta, chhikatapuni ñak'arisqaykumantawanri?

²⁵ Sayk'usqas k'umuykachaspalla kashayku, ukhuykutaj pampata qharastakuspa

²⁶ Jatarikuy! Jamuy, yanapawayku! Munakuyniykirayku salvawayku.