Salmos 42 - Qheshwa Biblia DC

LIBRO II [SALMOS 42-72] Almayqa Diosmanta ch'akichikun

¹ Imaynatachus tarukaqa, yakumanta ch'akichikuytawan ansaqeyaspa mayuta mask'an, ajinata, Diosníy, qanta mask'ayki.

² Kausaj Diosmanta ch'akichikuni. Mayk'ajtaj Diospa ñaupaqenman chayasajri?

³ Maytaj Diosniykiri?, nispa, sapa rato tapushawajtinku, tuta p'unchay waqaynillay mikhunayqa karqa.

⁴ Kaykunapi yuyani chayqa, llakiywan atipachikuni. Diospa wasinman pusasqayta, qhaparispa, kusiywantaj yupaychaspa, chaypachamá jatun fiesta karqaqa.

⁵ Imaraykutaj q'enaqakuymanri? Imaraykutaj t'ukuspalla kaymanri? Suyayniyta churani Diospi. Diosta yupaychasajraj. Paymin Salvawajniy Diosneyqa.

⁶ Diosníy, kallpa wañuypacha kani. Chayrayku qanmanta yuyarikusaj, Jordán mayumantapacha, Hermón, Mizar orqomantapachataj.

⁷ Ukhu wayq'ospi yakoj phajchasqan sinch'ita uyarikun, kay chimpaman, jaqay chimpaman. Yaku apachimusqaykita patayta phullchimun.

⁸ Chaywampis, Señorqa khuyakuyninta p'unchaypi chayachimuwan. Tutantaj noqa takillasajpuni, mañakuspallapunitaj kasaj kausachiwaj Diosniymanta.

⁹ Jark'akuwaj Diosniyta nini: Imaraykutaj qonqawankiri? Imaraykutaj llakisqa purinay tiyan enemigosniypa sarusqanri?

¹⁰ Tullusniypis nanawanña, enemigosniy toreawasqankumanta. Tapullawankupuni: Maytaj Diosniykiri?, nispa.

¹¹ Imaraykutaj q'enaqakuymanri? Imaraykutaj t'uruspalla kaymanri? Suyayniyta Diospi churani. Diosta yupaychasajraj. Paymin Salvawajniy Diosneyqa.