Salmos 41 - Qheshwa Biblia DC

Onqosqaj mañakuynin

¹ Kusikuyniyojmin mana kallpayoj wajchapi yuyajqa. Señor payta sajra tiempopi libranqa.

² Señorman paytaqa jark'anqa, kay pachapi kusiyta kausaytataj qospa, manataj enemigosnimpa munayninmanqa saqenqachu.

³ Señorqa payta onqoynimpi kallpachanqa. Onqoyninta allinman tukuchenqa.

⁴ Noqa nerqani: Señor khuyakuway, thañichiway, contraykipi juchallejtiypis.

⁵ Enemigosneyqa noqapaj mana allin kajta munanku. Mayk'ajtaj sutin wañonqa, chinkasqataj kanqa?, nispa.

⁶ Watukuwaj jamuwanku chaypis mana tukuy sonqochu jamuwanku. Tukuy ima sajra kajta sonqonkupi waqaychanku. Jawaman llojsispataj willakamunku.

⁷ Chejnikuwajkunaqa tukuyninku tantakuspa noqamanta parlakuwanku. Yuyanku juchayrayku ñak'arisqayta.

⁸ Yuyankutaj: Supaypa onqochisqan chayqa, kunanqa manaña camanmanta sayarenqañachu, nispa.

⁹ Sumaj kaj kausaqeypis, atienekusqay kaj, noqawan mikhoj ima, chay wasanchawan.

¹⁰ Qantaj, Señor, khuyakuway, sayarichillaway ari ruwasqankuman jina kutichinaypaj.

¹¹ Chaypi yachasaj qanta kusichisusqayta, enemigoy, atipawasqanta ama takinampaj.

¹² Noqatarí makisniykipi jap'iwanki, allin kausayniyoj kasqaykirayku. Ñaupaqeykipipuni wiñaypaj waqaychakuway.

¹³ Yupaychasqa kachun Israelmanta Diosnin, wiñaypa wiñaynimpaj. Ajina kachun.