Salmos 40 - Qheshwa Biblia DC

Munayniykita ruwayqa kusiypuni

¹ Señorpi tukuy sonqo suyakorqani. Paytaj k'umuykamuspa qhaparikusqayta uyariwarqa.

² Wañuy jusk'umanta orqhowarqa. T'urupi chinkaykunaymanta jark'awarqa. Sinch'ita sayachiwan uj chhanka patapi. Chakisniytataj kallpachan thuruta sarunaypaj.

³ Simiyman churarqa uj mosoj takiyta, Diosninchejta yupaychana takiyta. Ashkha runas chayta rikuspa sonqonkuta wawayachenqanku, Señorpitaj suyanqanku.

⁴ Kusikuyniyojmin Señorpi suyaj runaqa, manataj wapu wapustaqa mask'anchu, nitaj llullapi purejkunatapis mask'anchu.

⁵ Señor Diosníy. Ashkha t'ukuna imasta noqaykupaj ruwarqanki. Maytataj noqaykumanta yuyarikuwayku. Ni imapis qanwanqa ninakunchu. Sichus chaykunamanta willayman, parlaymantaj chayqa, mana tukuchiyta atiymanchu.

⁶ Qanqa mana munankichu uywa ñak'asqasta, nitaj trigo jaywanastapis. Mana mañankichu uywa q'olachisqasta, nitaj juchas pampachakunampaj jaywasqastapis. Astawanqa ningrisniyta kicharerqanki.

⁷ Chayrayku nerqani: Kaypi kani, nispa, imaynatachus libropi nisqanman jina.

⁸ Diosníy, tukuy sonqo munayniykita ruwayta munani. Yachachiwasqasniykita sonqoypi jap'ini.

⁹ Jatun tantakuypi cheqan salvacionmanta willarqani. Qan, Señor, sumajta yachanki, Señor, mana ch'in kakusqayta.

¹⁰ Cheqan kasqaykimantaqa manapuni sonqoypi pakanichu, cheqan sonqo kasqaykita, salvacionniykimantawan parlarqani, cheqan kayniykita, munakuyniykita jatun tantakuypi.

¹¹ Qantaj, Señor, khuyakuyniykita ama jark'awaychu, munakuyniykiwan cheqa kayniykiwan, wiñaypaj waqaychaway.

¹² Chay chhika llakiykuna qhatiriwan. Willakunaypaj ni yupaytapis atinichu, sajra ruwasqasniy ch'ipaykuspa urmachiwanku. Niña qhawaytapis atiniñachu. Juchasneyqa chujchasniymantapis aswan jatun. Chaytaj kallpayta wañuchin.

¹³ Señor, jamullay ari librawaj, Señor usqhayta jamuy yanapanawaykipaj.

¹⁴ Wañuchiyta munawajkunaqa p'enqaypi rikhurichunku. Sajrata ruwayta munawajkunapis p'enqayta ayqechunku.

¹⁵ Noqamanta alqochakuwajkunaqa p'enqayta ayqechunku.

¹⁶ Qanta mask'ajkunari kusikuywan junt'asqa kachunku. Salvacionniykita munakojkunataj nichunku: Señorqa jatunchasqa kachun, nispa.

¹⁷ Noqa wajcha llakisqa kashajtiy, ama qonqawaychu, Señor. Qan yanapawanki, qan librawanki. Ama suyachikuychu, Diosníy!