Salmos 39 - Qheshwa Biblia DC

Kausayqa uj tiempollapaj

¹ Noqa nerqani: Allinta kausasaj, qalluywan ama juchachakunaypaj, simiyta wisq'asaj ñukuwan jina, sajra runas ñaupaqeypi kanankukama.

² Opalla karqani. Sumaj kasqaymantapis mana parlarerqanichu, llakiyniytaj yapakullarqapuni.

³ Ukhuypi sonqoyqa k'ajarerqa. Chayta yuyajtiy, nina jina laurarin. Jinamanta sinch'ita parlayta qallarerqani:

⁴ Señor, imaynatachus tukukunayta willaway, mashkha unaytachus kausanayta. Yachaytapuni munani mashkha unayllatachus kausanayta.

⁵ Ancha pisi kausayllata qan qowanki. Kausayneyqa ñaupaqeykipi mana imachu. Tukuy runaspa kausaynin uj samay jinalla.

⁶ Tukuy runasqa uj llanthu jina pasapunku. Cheqallamanta llakikuywan qhapajyanankupaj tantasqankupis qhasillapaj, nitaj yachankuchu pipajchus kananta.

⁷ Jina kajtenqa, Señor, imatañataj suyaymanri? Qanllapi suyakuni.

⁸ Juchasniymanta libraway. Ama wampu runas asipayawachunkuchu.

⁹ Ch'inlla karqani, mana parlarerqanichu, qan chay ruwaj kasqaykirayku.

¹⁰ Amaña wisq'awaychu. Makiykej wajtawasqanwan tukukushaniña.

¹¹ Qan runataqa jasut'ispa cheqanchanki, pampachankitaj, paypa aswan munasqantataj thuta jina tukuchinki. Tukuy runasqa samay jinalla kanku.

¹² Señor, mañakusqasuyta uyariway. Waqaspa mañakusqasuyta uyariway. Waqasqayta rikuspa ama ch'inlla kaychu. Qampajqa waj llajtayoj jina kani, ripoj p'isqo jina, ñaupa tatasniy jinataj.

¹³ Ama qhawawayñachu, uj chhikallantapis samarichiway, manaraj ripushajtiy, manaraj chinkapushajtiy.