Salmos 38 - Qheshwa Biblia DC

Diospa yanapayninta mañakunamanta

¹ Señor ama phiñasqa kaspa k'amiwaychu, nitaj jasut'iwaychu phiñakuyniykipi.

² Flechasniyki noqata t'ojsiykuwanku, makiykitaj maqawan.

³ Juchasniymanta phiñakojtiyki, tukuy ukhuy onqosqa kashan. Mana uj tullullaypis allin kanchu.

⁴ Tukuy sajra kayniy jeq'eqachishawan. Uj llasa q'epita jina mana apayta atinichu.

⁵ Wampuyasqayrayku nanasqasniy q'eyacharan, asnankutaj.

⁶ K'umuykachaspalla umphupacha purini, tukuy p'unchaypis llakisqalla kani.

⁷ Q'oñi onqoywan wasayqa k'ajarishan. Tukuy ukhuy onqosqa.

⁸ Mana kallpayoj t'una t'una kashani. Sonqoy wawayasqanmanta waqani.

⁹ Señor, qan yachanki tukuy munasqayta. Khaykakusqaypis qampajqa mana pakasqachu.

¹⁰ Sonqoyqa phataj jinaña kashan, kallpaytaj pisiyarparin, ñawisniypis chharpuyapun.

¹¹ Sumaj kausaqesniy, ayllusniy kajkunapis, mana chayamuwankuchu; karullapi kanku nanasqasniymanta.

¹² Wañuchiwayta munajkunaqa tojllata churawanku. Mana allin kayniyta munajkunaqa contrayta parlanku, aleqamantataj wasanchayta munawanku.

¹³ Noqarí mana uyarejman tukuni, joq'arapis kayman jina. Manapis uyarej kayman jina, mana simiyta kicharinichu.

¹⁴ Joq'ara jina kani ni imata kutichikuspa.

¹⁵ Noqaqa qampi suyani, Señor Diosníy. Paykunaman qampuni kutichiy.

¹⁶ Noqaqa nini ama asikunawankuta, noqa urmajtiy, ama takinankuta nini.

¹⁷ Cheqamanta urmanayashaniña. Nanaykunayqa mana kakojta saqewanchu.

¹⁸ Chayrayku, juchasniyta willakusaj; chay juchasniy llakichiwan.

¹⁹ Enemigosniy yapakunku. Ashkhas mana imallamanta chejnikuwanku.

²⁰ Allin ruwasqaymanta sajrata kutichiwanku, allin kajta mask'asqaymanta contraypi churakunku.

²¹ Señor, ama sapitayta saqerpariwaychu. Diosníy, noqamanta ama karunchakuychu.

²² Diosníy, salvawajníy, usqhayllata jamuy yanapawaj.