Salmos 37 - Qheshwa Biblia DC

Señorpi atienekuy

¹ Ama phiñakuychu sajrata ruwajkunarayku, amataj envidiakuychu sajrata ruwajkunamanta.

² Usqhayllata pasto jina ch'akinku, qhora jinataj qhawinku.

³ Señorpa atienekuy, allin kajtataj ruway. Kay jallp'api kausakuy, sonqo junt'asqataj tiyakuy.

⁴ Señorta tukuy sonqoykiwan munakuy. Paytaj sonqoykej munasqanta qosonqa.

⁵ Señorpa makisnimpi kausayniykita churay. Paypi atienekuy, paytaj yanapasonqa.

⁶ Cheqan kayniykita k'anchayta jina k'anchachenqa. Allinniykipaj kajtapis chaupi diata jina k'ancharichenqa.

⁷ Ch'in kakuy Señorpa ñaupaqempi. Suyakuy pacienciawan pay yanapanasunta. Ama phiñakuychu kausaypi allin risqanmanta, nitaj sajrata wakichikojkunamantapis.

⁸ K'ajaj phiñakuyta saqey, qhesachaytaj; amapuni phiñakuychu, imaraykuchus chayqa astawan millayman tukuchin.

⁹ Cheqamanta sajra runasqa jawaman wijch'usqas kanqanku. Señorpi suyajkunarí, kay jallp'ata chayaqepaj jap'enqanku.

¹⁰ Manaña sajra runas kanqankuchu uj chhikamantawan, mask'aspapis manañapuni tarinkiñachu.

¹¹ Llamp'u sonqoyojkunaqa, jallp'asta chayaqepaj jap'enqanku, sonqo tiyasqastaj kakonqanku.

¹² Juchasapaqa cheqan runaj contranta, sajra imasta wakichin, chejnikuywantaj kiru k'arukuyta leqhopayan.

¹³ Señortaj paymanta asikun, imaraykuchus yachan sajrapajqa horan chayamusqantaña.

¹⁴ Sajrakunaqa espadankuta orqhokunku, flechankutataj wakichikunku urmachinankupaj, wañuchinankupajtaj wajchasta, llamp'u sonqoyojkunata, sumaj kausayniyoj runastawan.

¹⁵ Chay espadaqa kikin sonqollankutataj t'ojsiykonqa, flechasninkutaj p'akirakonqanku.

¹⁶ Cheqan runaj pisi kapuynenqa, aswan allin, qhapaj sajra runaj ashkha kapuyninmanta nisqaqa.

¹⁷ Señorqa sajra kajkunata tukuchenqa, allin runastataj sumajta sayachenqa.

¹⁸ Mana juchayoj kausajkunata Señorqa waqaychan. Paykunaj chayaqenkoqa wiñaypaj kanqa.

¹⁹ Sajra p'unchaypi mana p'enqachisqachu kanqanku, yarqhay kajtintaj sajsachisqas kanqanku.

²⁰ Sajra runasqa ch'aki qhora jina lauranqanku. Señorpa enemigosnimpis q'osñi jina chinkanqanku.

²¹ Sajra runasqa manukuspapis mana qopunchu, allin runarí khuyakuspa tukuy sonqo qon.

²² Mayqenkunatachus Señor bendicin, chaykunaqa jallp'ata chayaqepaj jap'enqanku. Pikunachus maldicin chaykunaqa wijch'usqas kanqanku.

²³ Runaj puriyninta Señorqa yachachin, paypa munasqan ñanmantaj churan.

²⁴ Runa urmajtimpis, mana urmasqachu qhepakonqa, imaraykuchus Señorqa makinmanta jap'in.

²⁵ Noqa wayna karqani; kunantaj machuña, ni jayk'apis k'acha runataqa wijch'usqata rikorqanichu, nitaj wawasnintapis khuyayta mañakojtaqa.

²⁶ Khuyakullampuni payqa, manutataj qollampuni, wawasnintaj bendición kanku.

²⁷ Sajra kajmanta karunchakuy, allin kajtataj ruway, wiñaypajtaj uj cheqapi tiyakunki.

²⁸ Señorqa cheqan kajta munakun, manataj qonqapunchu paypi yuyaj runamanta, sajra runatataj tukuchin, manataj saqenchu wawasniyoj kanankuta.

²⁹ Cheqan runastaj jallp'ata chayaqenkupaj jap'enqanku, chaypitaj wiñaypaj kausanqanku.

³⁰ Allin runaqa yachaywan parlan. Allin runaqa cheqanta parlan.

³¹ Sonqompi Diospa yachachisqanta apan, ni jayk'ajpis chakisnin llust'anqanku.

³² Sajra runaqa, sumaj runata wateqan, wañuchiyta munaspa.

³³ Señorqa mana munanqachu paykunaj makisnimpi urmanankuta, nitaj saqenqachu juchachakunankuta.

³⁴ Señorta kasukuy, paypi suyay; pay jatunyachisonqa, jallp'atataj chayaqeykipaj qosonqa. Ñawisniykiwan qhawanki sajra runasta wijch'usqankuta.

³⁵ Phiña sajra runata rikuni, tukuynejman uj sach'aj ramasnin wiñan ajinata.

³⁶ Chantá riporqa. Chinkaporqataj. Mask'arqani, manataj tariyta aterqanichu.

³⁷ Cheqan runata, llimphu kausayniyoj runatawan qhawariy; paypajqa sonqo tiyakuy kanqa.

³⁸ Mana kasukoj runasrí pampachasqas kanqanku. Sajra runastaj tukuchisqas kanqanku.

³⁹ Allin runaspaj Señormanta yanapay jamun. Llakiy tiempopi paymin jark'akojninkoqa.

⁴⁰ Señortaj ayqenankupaj yanapan. Sajra runasmanta ayqechin, Chay sajra runasmanta salvan, imaraykuchus paypi pakakuyta mask'arqanku.