Salmos 36 - Qheshwa Biblia DC

Diospa khuyakuyninmanta

¹ Sajraqa juchasapaj sonqon ukhuman parlan: Payqa ni jayk'ajpis yuyarinchu, Diosta manchachikuna kasqanta.

² Payqa yuyakun sumaj runa kasqanta. Pay yuyan juchasnin mana chejnina kasqanta.

³ Payqa khuchi simi, llullataj. Sumaj yuyayta qhesachaspa, manaña sumaj kajta ruwanchu.

⁴ Camampi winkuspa sajrata ruwananta yuyaynimpi wakichikun. Sajra ñannimpi kayta munampuni, manataj sajra kajta saqeyta munanchu.

⁵ Señor, munakuyniykeqa cieloman chayan. Phuyustapis wasarin cheqa kayniykeqa.

⁶ Cheqan kayniykeqa jatun orqos jina. Nisqaykitaj, jatun mar qocha jina, ukhutaj. Qan Señor, waqaychanki tukuy runasta, uywastawan.

⁷ May sumajpuni munakuyniykeqa, Señor. Runasta lijrasniyki urapi pakakuyta mask'anku.

⁸ Wasiykipi ashkha mikhuna kajwan paykunaqa sajsakunku, misk'i yaku mayumantataj ujyachinki.

⁹ Qampi kausay yaku pujyoqa kashan. K'anchayniykipitaj k'anchayta rikuyta atiyku.

¹⁰ Rejsisojkunaman munakuyniykita rikuchiy, cheqan kayniykitataj cheqan sonqoyojkunaman rikuchiy.

¹¹ Ama saqeychu machu machus sarunawankuta, ni juchasapaspis apaykachanawankuta.

¹² Qhawaychej imaynatachus sajrata ruwajkunaj urmasqankuta. Manaña ujtawan sayarinankupaj urmanku.