Salmos 34 - Qheshwa Biblia DC

Diospa waqaychaynin

¹ Tukuy tiempo Señorta bendicisaj, simiytaj payta yupaychallanqapuni.

² Noqaqa Señormanta jatunta kusikuni, uyariychej, kusikuychejtaj, llamp'u sonqoyoj runas.

³ Khuska, uj simillataj, Señorpa jatun sutinta yupaychaychej.

⁴ Señorta qhaparikorqani, paytaj uyariwarqa. Tukuy manchachikuykunasniymanta pay librawarqa.

⁵ Señorta qhawajkunaqa, manchay kusisqas kanku. Ni jayk'ajpis k'akeqa qhepakunmanchu.

⁶ Kay pacha runaqa qhaparikorqa, Señortaj uyarerqa, tukuy llakiykunasninmantataj librarqa.

⁷ Señorpa angelnin jark'an, salvantaj tukuy payta yupaychajkunata.

⁸ Qhawaychej yachaychejtaj, Señorqa k'acha kasqanta. Kusikuyniyojmin paypi suyaj runaqa.

⁹ Señorta yupaychaychej, paypa ajllakusqasnin kajkuna. Ni imapis pisipanchu Señorta yupaychajkunajtaqa.

¹⁰ Qhapajkunaqa wajchayanku, yarqhaypitaj qhepanku. Señorta mask'ajpatari mana imapis pisenqachu.

¹¹ Jamuychej wawasníy, uyariwaychej. Yachachisqaykichej Señorta yupaychayta.

¹² Unaytachu kausayta munanki? Kusisqachu kausayta munanki?

¹³ Ama sajrata parlaychu. Simiykipis ama llullata parlachunchu.

¹⁴ Karunchakuy tukuy ima sajramanta, allin kajtataj ruway. Sonqo tiyasqa kayta mask'ay, chaytataj qhatiy.

¹⁵ Señorqa k'acha sonqoyoj runasta qhawan, qhaparikusqankutataj uyarin.

¹⁶ Señorqa sajra ruwajkunaj contrampi urmachin, kay jallp'amanta sutinkuta chinkachinampaj.

¹⁷ Cheqan sonqoyoj runaspa qhaparikusqankuta Señorta uyarin, tukuy llakiykunasninmantataj orqhon.

¹⁸ Señorqa qayllallapi salvanampaj kashan, llakisqa sonqoyojkunata, umphuyasqa sonqoyojkunatawan.

¹⁹ Cheqan sonqoyoj runapaj tukuy llakiykuna jatarin, chaywampis Señorqa tukuy chay llakiykunamanta orqhon.

²⁰ Señorqa tukuy tullusninta waqaychan, ni uj tullullampis p'akikonqachu.

²¹ Sajrakunataqa sajra kaynillankutaj wañuchin. Cheqan kaj runata chejnikojkunaqa jasut'isqas kanqanku.

²² Señorqa paypa kamachisninta salvan. Paypi atienekojkunaqa mana jasut'isqaschu kanqanku.