Salmos 31 - Qheshwa Biblia DC

Señorpi atienekuymanta

¹ Señorníy, qampi atienekuyki, ama ni jayk'aj p'enqachisqa kasajchu, cheqan kayniykipi libraway.

² K'umuykamuspa uyarillaway. Usqhayta librallaway ari. Qan jark'awaj chhanka kay ari. Salvakunay wasitaj kay.

³ Qan kanki chhankay, pakakunaytaj. Sutiykirayku pusaway, jark'akuwaytaj.

⁴ Pakaypi tojllata churawasqankumanta orqhoway. Qanmin jark'akuwajneyqa kanki.

⁵ Makisniykipi almayta churani. Orqhokapuwaytaj cheqa Señor Diosníy.

⁶ Qhasi mana kaj lantita yupaychajkunata chejnikuni. Noqataj Señorpi atienekuni.

⁷ Khuyakuyniykipi maytapuni kusikusaj, qan rikunki llakiyniyta. Yachankitaj ñak'ariyniyta.

⁸ Mana enemigosniypa makisninman jaywaykuwarqankichu, qan sinch'ita chakisniyta sayacherqanki.

⁹ Señor, noqamanta khuyakuwan. Llakiypi kashani. Llakiywan ñawisneyqa chharpuyanña, tukuy ukhuypis, tukuy kayniypis. Jinallataj almaypis ukhuypis.

¹⁰ Llakikusqay waqasqaywan, tukuy ukhuy llauchhuyapun. Llakiytaj kallpayta tukuchin. Tukuy ukhuy llauchhuyarparin.

¹¹ Tukuy enemigosniypa kusipayanan kani. Runa masiypa asikunan kani. Rejsiwajkunataj noqamanta ayqekuwanku. Callepi rikuwajkunapis ayqenku.

¹² Noqamanta qonqasqatapuni qonqapuwanku, wañusqañapis kayman jina, yuru p'akisqa jina kani.

¹³ Runas chhipinakusqankuta uyariyta atini. Tukuynejpi mana allinchu noqapajqa. Uj runa jinalla contraypi sayarinku, wañuchinawankupajtaj wakichikunku.

¹⁴ Chaywampis, noqaqa Señor, qampi atienekuyki: qanqa Diosniy kanki, nispa.

¹⁵ Kausayniyta makiykiman churani. Qhatiykachawaj enemigosniymanta libraway.

¹⁶ Khuyakuyniykiwan qhawaway kay kamachiykita. Munakuyniykirayku salvaway.

¹⁷ Qanta qhaparikuyki, Señor. Ama p'enqaypeqa churawaychu. Sajrakunata p'enqaypi rikhurichiy. Sepulturamantaj paykunata chayachiy.

¹⁸ Ch'inyachunku llulla simi runas. Paykunaqa asipayaspa parlanku, cheqan runaj contranta.

¹⁹ Jatunchasojkunapaj may jatunmin munakuyniykeqa, sumaj waqaychasqata qolqeta jina jallch'anki runaj rikunanta, qampi atienekojkunaman qonki.

²⁰ Qan paykunata jark'akunki, sajra runas millay ruwayta munajkunamantataj libranki, wasiyki ukhupitaj pakaykunki, enemigosnimpa churanakuyninkumanta.

²¹ Jatunchasqa kachun Señorqa, munakuyninwan jatuchaj imasta ruwapuwarqa, noqa llakisqa phutisqa kashajtiy.

²² Mana imanakuyta atispa, Señorqa qonqapuwanchá nerqani. Yanapanawaykita mañakusojtiytaj, qhaparikusqayta qan uyariwarqanki.

²³ Señorta munakuychej payta qhatejkuna. Cheqan sonqoyojkunata waqaychan. Astawantaj wapu wapuman kutichin, sajra kayninkuman jina.

²⁴ Kallpachakuychej, sonqoykichejpitaj kusikuychej, qankuna Señorpi suyajkuna.