Salmos 30 - Qheshwa Biblia DC

Señorman yupaychaykuna

¹ Señor, noqa yupaychayki, qan librawasqaykirayku, manataj enemigosniy asipayanawankuta saqewasqaykirayku.

² Señor, Diosníy, yanapayniykita mañakorqayki, qantaj thañichiwarqanki.

³ Qan Señor wañuymanta salvawarqanki, kausayta qowarqanki, wañuymantataj librawarqanki.

⁴ Qankuna Señorta qhatejkuna, takiykunata takiychej! Santo sutintataj alabaychej.

⁵ Phiñakuynenqa uj ratollapaj, k'acha kaynintaj tukuy kausaypaj. Ch'isin waqasun chayqa, tutamanta kusikusun.

⁶ Sinch'ita sayaykorqani, yupaycharqanitaj: Ni jayk'aj imapis urmachinawanta.

⁷ Qan, Señor, k'acha khuyakuyniykiwan sinch'ita sayachiwarqanki. Manaña yanapawajtiykitaj, yuyayniy chinkampacha.

⁸ Señor, qanman qhaparikamusaj, qanmantataj mañakusaj Señor.

⁹ Noqa wañuyman chaypis p'ampawajtinkupis, imatataj tariymanri? Ñut'u jallp'aqa mana yupaychasunkimanchu. nitaj cheqa kajniykimanta parlanmanchu.

¹⁰ Señor, uyariway, noqamanta khuyakuwaytaj. Señor, yanaparillaway!

¹¹ Llakiyniyta kusiyman tukuchinki. Qhasqa p'achata orqhowaspa, kusiywan p'achallichiwanki.

¹² Chayrayku, Señor Diosníy, mana ch'in kayta atiymanchu. Yupaychasuspa takisajpuni wiñaypaj wiñaynintinkama.