Salmos 29 - Qheshwa Biblia DC

Señorpa atiynin k'anchaynintaj

¹ Señorta yupaychaychej Diospa wawasnin, janaj pachapi kajkuna. Señorpa atiyninta, jatun kaynintawan alabaychej.

² Señorpa jatun sutinta yupaychaychej, k'acha wasimpitaj Señorman qonqorikuychej.

³ Señorpa parlasqan mar qochapi uyarikun. Atiyniyoj Diosqa qhon qhon jina uyarichikun. Señorqa jatun mar qocha patapi kashan!

⁴ Señorpa parlaynenqa sinch'i, Señorpa parlaynenqa atiyniyoj.

⁵ Señorpa parlasqanqa cedrosta k'ajllan. Señorqa Líbano cedrosta k'ajllan.

⁶ Sirión, Líbano orqostawan kharkatichin, torosta jina, uña torosta jinataj phinkiykachachin.

⁷ Señorpa parlasqanqa nina laurayta wijch'umun.

⁸ Señorpa parlasqan ch'in pampata kharkatichin. Señorqa Cades ch'in pampata kharkatichin.

⁹ Señorpa parlasqanqa encinas sach'asta chaqoykun, montestataj mana sach'ayojta saqerparin, yupaychana wasimpitaj tukuy jatunchanku.

¹⁰ Señorqa parasta parachin. Señorqa wiñaypaj rey jina kamachin.

¹¹ Señorqa ayllunta kallpachan. Señorqa sonqo tiyasqa kaywan ayllunta bendicin.