Salmos 28 - Qheshwa Biblia DC

Señorqa mañakusqanchejta uyarin

¹ Jark'awajníy, Señor, qanta wajyakuyki. Amapuni mana uyarejqa tukuychu. Mana uyariwaj tukuwaj chayqa, wañusqaswanchá yupakuyman.

² Yanapayniykita qhaparikuspa mañakusqayta uyariway, makisniyta wasiykiman oqharejtiy.

³ Ama sajrastawan khuskataqa qhatatiwaychu, amataj millaykunata ruwajkunatawampis purichiwaychu. Uyapuraqa misk'i simis kanku, sonqonkupitaj sajras kanku.

⁴ Sajrata ruwasqankuman jina jasut'iy, imatachus ruwasqankuman jinataj kutichipuy.

⁵ Señorpa ruwasqasninta mana reparayta munarqankuchu. Chayrayku paykunata Señorllataj tukuchichun, amataj oqharichunñachu.

⁶ Yupaychasqa Señorqa kachun, mañakusqasniyta uyariwasqanrayku.

⁷ Señormin sinch'i jark'awajneyqa. Paypi atienekorqani, paytaj yanapawarqa. Sonqoy kusisqa kashan. Chayrayku Señorman takisaj, agradecekusajtaj.

⁸ Señorqa ayllunman kallpata qon. Payqa ajllasqan reyninta kallpachan, jark'antaj.

⁹ Señor, aylluykita salvay, qampata kajkunatataj yanapay. Pusaykachay, waqaychay, ovejata michej jina waqaychay, wiñaypajtaj ichurikuspa pusaykachay.