Salmos 26 - Qheshwa Biblia DC

Llimphu kausayniyojpa mañakuynin

¹ Señor, cheqanta ruwaway ari, allin kausaypi purisqayrayku. Qampi mana iskayrayaspa Señor atienekuni.

² Allinta qhawaway yachanawaykipaj, maychus kasqayta yachaway, sonqoy ukhupi yuyasqasniyta, munasqasniyta ima.

³ Noqaqa munakuyniykipi yuyallanipuni, cheqan ñanwiykipitaj purillanipuni.

⁴ Llulla runaswan ni jayk'aj kausakorqanichu, nitaj puraj uyaswanqa tantakorqanichu.

⁵ Sajrakunaj tantakusqankutaqa chejnikuni. Ni jayk'aj kausakorqanichu Diosta mana manchachikojkunawanqa.

⁶ Señor, altarniykiman qayllaykuyta munani, makisniypis tukuy juchamanta mayllasqa.

⁷ Yupaychasuspataj takiyta munani, tukuy sumaj ruwasqasniykita willaspa ima.

⁸ Señor, wasiykita noqa munakuni, maypichus atiyniykiwan tiyakunki chaytawan.

⁹ Juchasapastawan khuskaqa ama wañuchiwaychu, runa wañuchistawan khuskapis ama jasut'iwaychu.

¹⁰ Paykunaj makisninkoqa junt'a kashan, sajra kaywan, lluk'iykunawan.

¹¹ Chaywampis, kausayneyqa mana ch'ichiyoj kashan; libraway, khuyakuytaj noqamanta.

¹² Mana kuyurispa sinch'ita sayashani, Señorta yupaychasaj ayllumpa ñaupaqempi.