Salmos 24 - Qheshwa Biblia DC

Reypa jatun kaynin

¹ Tukuy jallp'a Señorpata, tukuy ima chaypi kajpis; tukuy kay pachaqa paypata, tukuy ima chaypi kajkunapis.

² Señorqa kay jallp'ata sayacherqa, mar qocha patapi, mayus patapi ima.

³ Pitaj Señorpa orqonman wichariyta atinmanri? Pitaj Señorpa wasimpi tiyayta atinmanri?

⁴ Llimphu makisniyoj kaj, llimphu sonqoyoj kaj, pichus qhasi dioskunata mana yupaychaj kaj, nitaj qhasi manakajta parlaj kaj.

⁵ Chay runata Señor Diosnin, salvajnintaj, bendicenqa, cheqan kajtataj paypaj ruwanqa.

⁶ Ajina kanku Señorta mask'ajkunaqa, Jacobpa Diosnin ñaupaqempi kayta munajkunaqa.

⁷ Kicharikuychej wiñay punkus! Sumaj kichasqas kaychej, atiyniyoj reytaj yaykumonqa!

⁸ Pitaj kay atiyniyoj reyri? Sinch'i sumaj kallpayoj kaj Señor, maqanakupi atipaj Señor.

⁹ Kicharikuychej wiñay punkus! Sumaj kichasqas kaychej, atiyniyoj reytaj yaykumonqa!

¹⁰ Pitaj kay atiyniyoj reyri? Tukuy atipaj Señor! Pay atiyniyoj reyqa!