Salmos 21 - Qheshwa Biblia DC

Atipaymanta takiy

¹ Señorníy, reyqa kusisqa kashan kallpachasqaykirayku. Ancha kusisqa, imaraykuchus qan atipachinki.

² Sonqompi munasqanta junt'anki, munasqantataj qonkipuni.

³ Jatun bendicioneswan qan taripaj llojserqanki. Qorimanta pillutataj umanman churarqanki.

⁴ Kausayta mañakusorqa, qorqankitaj ashkha watasta, wiñay kausaytataj.

⁵ Yanapasqaykirayku atiynenqa jatun. May allin jatumpaj qhawasqa kanantataj ruwarqanki.

⁶ Wiñaypaj bendicerqanki. Ñaupaqeykipi kusiywan sonqonta junt'acherqanki.

⁷ Qan, rey, mana jayk'ajpis urmankichu, Señorpi atienekusqaykirayku, jatun Diospa munakuynimpi suyanaykirayku.

⁸ Atiyniyoj makiyki tukuy enemigosniykiman chayanqa, paña makiykitaj chejnisojkunaman chayanqa.

⁹ K'ajashaj hornoman jina churaykunki, justiciata ruwanaykipaj rikhurimunki chaypacha. Chaypacha Señorta sinch'i phiñakuynimpi, q'olaykuchenqa, ninawantaj chinkachenqa.

¹⁰ Kay pacha runas ukhumanta chinkachinki.

¹¹ Sajrata ruwasuyta munajtinku, contraykipi wakichikojtinkupis, mana imatapis ruwasuyta atinkuchu.

¹² Qan tukuyninta ayqechinki, paykunaj contrankupitaj flechaykita kachaykunki.

¹³ Jatarikuy atiyniykiwan, Señor, takisqayku qampa atipasqaykita.