Salmos 20 - Qheshwa Biblia DC

Atipanapaj mañakuna

¹ Señor uyarisuchun phutiypi kajtiyki. Kikin Jacobpa Diosnin jark'akusuchun.

² Yanapata kachamusuchun tiyakuna wasinmantapacha. Sionmantapachataj kallpachasuchun.

³ Yuyarikuchun tukuy jaywasqasniykimanta. Tukuy sonqotaj jap'ichun altarpi uywasta q'olachisqasniykimanta.

⁴ Sonqoykej tukuy munasqanta junt'achun, tukuy yuyasqasniykitapis ruwachun.

⁵ Atipasqaykimanta kusikusunchej, wiphaylata oqharisunchej, Diosniykejpa sutimpi. Señortaj junt'achun tukuy mañakusqaykita.

⁶ Noqa yachani Señor atipachinanta ajllasqan chay reyta. Janaj pacha tiyakunamanta payta uyarenqa, jatun atiyninwan atipachispa.

⁷ Ujkunaqa guerra carretasninkuman atienekunku, wajkunataj caballosninkuman. Noqanchejri Señor Diosninchejman atienekusunchej.

⁸ Paykuna llauchhiyanku urmankutataj. Noqanchejtaj sinch'illatapuni sayanchej.

⁹ Señor, reyniykuta atipachiy, wajyakusojtiykupis uyariwayku.