Salmos 2 - Qheshwa Biblia DC

Qanqa waway kanki

¹ Imatataj naciones ch'ajwankuri? Llajtaspis qhasillapaj mana kajta yuyankuri?

² Kay pachapi reyeswan kamachejkunawan ima, Señorpa contranta oqharikunku, kachamusqan contrampi ima kay jinata:

³ Watanasninta p'itirana, watawasqanchejmanta kacharichikuna, nispa.

⁴ Cielopi kamachej Señorqa, paykunamanta asiykukun.

⁵ Chanta phiñakuspa paykunaman parlan, sinch'i phiñakuyninwantaj sustullichin:

⁶ Sión santo orqoypi, ajllasqayta rey kanampaj jawiniña.

⁷ Tukuymantaj willasaj Señorpaj kamachisqanta. Payqa niwan: Qanqa waway kanki, kunan noqa kausayta qoyki.

⁸ Mañaway chayaqeykipaj nacionesta, tukuy kay pachatataj k'uchunkama qampata kanampaj qosqayki.

⁹ Fierro varawan kay pachapi reyesta tukuchinki. T'uru mankata jina paykunata p'akiranki.

¹⁰ Kay pachapi reykuna, juezkuna ima, uyariwaychej, kayta yachakuychej, cheqanchakuychejtaj.

¹¹ Kusiywan Señorta yupaychaychej, payta manchachikuywantaj k'umuykukuychej.

¹² Churita jatunchaychej ama phiñakunampaj, amataj ñampi chinkanaykichejpaj, pajtataj ñampi chinkachisqas kawajchej. Payqa kaymanta jinalla phiñakun. Payqa munakuyninta mask'ajkunaqa kusikuyniyojmin.