Salmos 18 - Qheshwa Biblia DC

Atipanamanta takiy

¹ Qan Señor kallpay kanki; noqa munakuyki.

² Qan pakakunay chhanka kanki, jark'akuwajniytaj, librawajniy Diosniytaj kanki. Qan kanki pakakunay chhanka, pakakunay escudo, salvawajniy, kallpay, altopi sumaj pakakunaytaj.

³ Qanqa, Señor, yupaychanapaj jina kanki. Wajyasojtiy enemigosniymanta salvawanki.

⁴ Wañuypa watanasnin ch'ipaykuwarqa. Sajra kajtaj llojlla para yaku jina mancharichiwarqa.

⁵ Wañoyqa ukhu pachaj watanasninwan mayt'uykuwan. Wañuypa tojllampi rikukuni.

⁶ Jina llakiypi kashaspataj Señorta wajyakuni. Mañakorqanitaj Diosniy yanapanawanta. Paytaj wasinmantapacha uyarimuwan, qhaparisqaytaj ningrisninkama chayan.

⁷ Chaypacha sinch'ita jallp'aqa kharkaterqa. Orqospis uranmantapacha thalarikorqanku. Señorpa phiñakuyninwan ikhasqas karqanku.

⁸ Senqanmantaqa q'osñi llojsirimorqa. Siminmantataj tukuy imata q'olaj nina llojsimun. K'ajarishaj nina brasas ima siminmanta t'akarikamun.

⁹ Janaj pachata kayllaykuchimorka, paytaj uraykamorqa, chakisnin urapitaj yana phuyus karqa.

¹⁰ Uj lijrayojpi montaykuspataj, wayraj lijrasnimpi phawarqa.

¹¹ Pakakunampajtaj sinch'i laqhayayta muyuynimpi churarqa, yanayarishaj yakuta, yanayarishaj phuyutawan.

¹² Uj lliphipej k'anchay ñaupaqenmanta llojsin. Phuyumantataj k'ajarishaj nina brasas granizo jina t'akakamun.

¹³ Patapi kaj Señorqa, janaj pachamanta uyarichikun qhon qhon jina, granizowan, nina brasaswantaj.

¹⁴ Flechasninta lliuj lliujkunasnintawan kachaykun, enemigosnintataj ch'eqerachispa ayqerachin.

¹⁵ Mar qochaj ukhun rikhurimun, kay pachaj sayanampis rikhurirparin, qampa k'amiyniykiwan Señor, senqaykej samayninwantaj.

¹⁶ Patamantapacha Dios makinta jaywamuwan; chay jina jatun mar qochamanta orqhowan.

¹⁷ Chay jina atiyniyoj enemigoymanta orqhowan, chejnikuwarqanku chaykunamantawan; paykunaqa noqamanta aswan kallpayoj karqanku.

¹⁸ Llakiypi kashajtiy ujllata maqaykuwarqanku, Señortaj yanapawarqa.

¹⁹ Libre kanaypaj orqhowarqa, munakuwasqanraykutaj salvawarqa.

²⁰ Señorqa cheqan ruwasqasninman jina t'inkachipuwan, llimphu kausayninman jinataj qopuwan.

²¹ Noqaqa Señorpa ñanninta qhaterqani. Ni jayk'aj Diosniymantaqa karuncharqanichu.

²² Sonqollaypi kashan tukuy nisqasnenqa. Ni jayk'ajpis kamachisqasninmantaqa karunchakunichu.

²³ Paypa ñaupaqempi mana pantaspa purerqani, sajra kajmanta karunchakuspa.

²⁴ Chayrayku Señorqa t'inkachipuwan cheqanta ruwasqayrayku, paypa ñaupaqempi llimphu sonqoyoj kasqayman jina.

²⁵ Qanqa, Señor, khuyakojtaqa khuyakullankitaj, cheqan runawampis cheqallantaj kanki.

²⁶ Ch'uwa sonqoyojwanqa ch'uwa sonqollataj kanki. Puraj uya runamantaj phiñakuyniykita rikuchinki.

²⁷ Llamp'u sonqoyojkunata qan salvanki, wapu wapustataj k'umuykachachinki.

²⁸ Qan, Señor, k'anchayta qowanki. Qan, Diosníy, laqha kayniyta k'anchaykunki.

²⁹ Yanapayniykiwan enemigoyta atipasaj, jark'achisqa perqantataj purisaj.

³⁰ Señorpa ñannenqa cheqanmin. Señorpa qosqayki nisqanqa cheqampuni. Diosqa waqaychan tukuy paypi suyakojkunata.

³¹ Pitaj Dios kanman Señorman astawanri? Waj Dios kanmanchu waqaychanawanchejpaj?

³² Dioslla noqataqa kallpachawan. Paylla may k'achata kausachiwan.

³³ Kallpata qowan chakisniy taruka jina phinkirinampaj. Paylla sinch'ita patapi sayachiwan.

³⁴ Paytaj sumajta maqanakupaj amañachiwan. Kallpachawantaj bronce arcosta mat'inaypaj.

³⁵ Qan waqaychawanki, salvawankitaj, paña makiykiwantaj sayachiwarqanki; khuyakuyniyki jatunyachiwan.

³⁶ Usqhayta thaskichiwanki, chakisniytaj mana llust'anqachu.

³⁷ Enemigosniyta qhatiykachaspa tariparqani, tukuchispataj kutirimorqani.

³⁸ Phirita ruwarqani. Manaña sayarinkuñachu. Chakisniy uramantaj urmarqanku.

³⁹ Qan maqanakupi kallpachawanki. Enemigosniytaqa ñaupaqeypi k'umuykachacherqanki.

⁴⁰ Enemigosniyta ñaupaqeykimanta ayqechinki, ajinataj chejnikuwajkunata tukucherqanki.

⁴¹ Yanapata mañakorqanku, nitaj pipis yanaparqachu. Señorta wajyakunku, paytaj mana uyarerqachu.

⁴² Wayraj apanan ñut'u jallp'ata jina phirerqani. Callespi t'uruta jina sarorqani.

⁴³ Qan librawarqanki oqharikoj llajtamanta. Nacionesta kamachinaypaj churawarqanki. Mana rejsisqay runastaj sirviwanku.

⁴⁴ Uyariwaytawankama kasuwanku. Waj llajtayojkuna kamachisqayta ruwanku.

⁴⁵ Waj llajtayoj runas llauch'iyanku, pakakusqankumantataj kharkatitispa llojsimunku.

⁴⁶ Kausachun Señorqa; waqaychawaj bendicisqa kachun. Salvawajniy Diosneyqa jatunchasqa kachun.

⁴⁷ Diosqa noqamanta kutikuwan. Pay ruwan tukuy llajtas kasunawankuta.

⁴⁸ Pay enemigosniypa phiñakuyninmanta salvawan, chay mana kasukuyniyoj contraypi sayaykojkunamanta. Qan, Señor, salvawanki maqanakuyta munajkunamanta.

⁴⁹ Chayrayku, Señor, noqa tukuy nacionespi yupaychayki, sutiykipitaj takisaj.

⁵⁰ Qanqa ajllasqayki reyman atipayta qonki; munakuywampuni Davidta, miraynintawan wiñaypaj qhawanki.