Salmos 17 - Qheshwa Biblia DC

Diospa waqaychayninta mañakunamanta

¹ Señor cheqan kajta mañakusqayta uyariway, qhaparikusqa aytapis uyarillaway, mañakusqayta uyariway, imaraykuchus mana llullakuspachu mañakushayki.

² Qanlla noqamantaqa maychus kajta niy. Qan yachanki imachus cheqan kajta.

³ Sonqoypi imachus kasqanta qan yacharqanki, ch'isin watoj jamuwarqanki. Ninaman churawarqanki yachanawaykipaj, manataj ima sajratapis noqapi tarerqankichu. Simiyta ama pantananta nerqani.

⁴ Qampa kamachisqasniykirayku, runaj ruwasqasninmanta, sajra ñankunamantawan karunchakuni.

⁵ Ñankunasniykipipuni purichiway; chakisniy ñankunasniykimanta ama llusp'inampaj.

⁶ Qanman qhaparikuyki, Diosníy, imaraykuchus qanqa kutichiwanki; ningriyta kichariy, parlasqayta uyarillaway.

⁷ Pañaykipi pakakojkunata, enemigosninkumanta qan salvawajqa, jatun khuyakuyniykita rikuchiy.

⁸ Ñawiykipis kayman jina waqaychaway. Lijraykej urampi pakaykuwan.

⁹ Ñak'arichiwaj sajra runaspa ñawisninmanta, enemigos mask'awaspa wañuchiwayta munajkunamantawan.

¹⁰ Wira kayninkuwan jatunchakunku; wapu wapulla oqharikuspataj parlarinku.

¹¹ Purinaykuta kunanqa wisq'aykunku, pampaman wijch'unawaykupaj qhawashawayku.

¹² Jap'iyta munaj león jina kanku, jusk'umpi pakasqa león jina.

¹³ Jatarikuy Señor, paykunawan uyapuramuy, paykunata qonqorichispa k'umuykachachiy. Espadaykiwan chay sajra runamanta salvaway.

¹⁴ Atiyniykiwan paykunamanta libraway, Señor. Libraway paykunamanta, kay mundomantawan. Paykunaj chayaqenkoqa kay kausaypi. Saqey paykunaj qhapajyanankuta, wawasninkutaj mikhuchunku phatanakukama, puchuchuntaj allchhisninkupajwan.

¹⁵ Noqaqa cheqamanta kusisqa qhepakusaj, uyaykita qhawarispa, rijch'ayniykipi rijch'arisqa rikukuspa.