Salmos 147 - Qheshwa Biblia DC

Tukuy atiyniyoj Diosman takina

¹ Yupaychasqa kachun Señor. May sumajmin Diosninchejman takeyqa, yupaychayqa k'achapuni, misk'itaj takeyqa.

² Señorqa watejmanta Jerusalenta jatarichin. Ch'eqerasqa israelitasta tantaykun.

³ Payqa sonqo p'akisqasta thañichin. Nanasqasnintataj jampin.

⁴ Payqa ch'askasta yupan, sapa ujtataj sutinmanta wajyan.

⁵ Señorninchejqa jatunmin, may atiyniyojtaj, yachaynimpis mana tukukuyniyoj.

⁶ Señorqa llamp'u sonqosta oqharin, sajra runastataj k'umuykachachin.

⁷ Señorman graciasta qospa takiychej; Diosninchejman arpaj waqayninwan takiychej.

⁸ Payqa cielota phuyuswan junt'achin. Pay jallp'apaj parata wakichin. Pay orqospi qhorasta wiñachin.

⁹ Pay uywasman mikhunata qon, q'arqaña uñas waqajtinkupis mikhuchin.

¹⁰ Diosqa mana caballoj kallpantachu munakun, nitaj runaj kallpantachu mask'an.

¹¹ Señorqa payta yupaychajkunata munakuywan qhawan; khuyakuynimpi suyajkunata munakun.

¹² Jerusalén, Señorta jatunchay. Sión, Diosniykita yupaychay.

¹³ Punkusniykej llavenasninta sinch'iyacherqa, llajta ukhuykipi runastapis bendicerqa.

¹⁴ Pay jallp'aykiman sonqo tiyakuyta apamun, allin trigowan sajsachisunki.

¹⁵ Pay palabranta kay jallp'aman apachimun. Palabranqa usqhayta corren.

¹⁶ Payqa rit'ita millmata jina t'akamun, escarchastapis ushphata jina qhallamun.

¹⁷ Chhullunkata granizota jina apachimun. Chirichimusqanta pitaj aguantayta atinmanri?

¹⁸ Pay kamachejtin chhullunkas chhulluranku. Pay wayrachimojtin, yakusqa puririnku.

¹⁹ Pay Jacobman palabranta willarqa. Kamachiykunasninta, yachachiykunasnintapis Israelman sut'incharqa.

²⁰ Mana ajinataqa ruwarqachu mayqen nacionwampis, paykunaqa Diospa kamachisqasninta mana yacharqankuchu. Señorqa yupaychasqa kachun.