Salmos 144 - Qheshwa Biblia DC

Señorpa yanapayninta mañakunamanta

¹ Yupaychasqa kachun Señor jark'awajneyqa; pay yachachiwan, amañachiwantaj, ch'ajwapi maqanakunaypaj.

² Paymin khuyakuwajniy, jark'awajniy, ancha sumaj pakakunay, librakunay ima. Payqa maqanakunay armas noqa jark'akunaypaj, payqa ayllusta makisniyman churan.

³ Señor, imataj runari paymanta yuyarikunaykipajri? Imataj runari chhikatapuni munakunaykipajri?

⁴ Runaqa uj phuyu jinalla, kausaynenqa chinkaj llanthu jinalla.

⁵ Señor, janaj pachaykita qhataray, uraykamuytaj, tapaykuy q'osñirinankupaj.

⁶ Flechasniykita lliuj lliujta jina qhawachiy, enemigosniykitataj t'ustillata ayqechiy.

⁷ Makiykita patamantapacha aysarimuy, librawaytaj jatun mar qochamanta, waj llajtayoj runaspa makinman urmanaymantawan.

⁸ Libraway llullakojkunamantawan, mayqenkunachus paña makinkuta oqharispa juranku, manataj junt'ankuchu.

⁹ Señor, uj mosoj takiyta takipusqayki, arpaswan takiykunata takipusqayki.

¹⁰ Qan reyesman atiypayta qonki, qan librarqanki David kamachiykita.

¹¹ Libraway wañuchej espadamanta, libraway waj runakunaj makinkuman urmanaymanta, libraway llullakojkunamanta, paykuna paña makinkuta oqharispa juranku.

¹² Qhari wawasniykoqa huertapi plantas jina wiñanku, warmi wawasniykutaj k'achanchasqa rumis jina kanku, Diosta yupaychana wasej sayantasnin jina.

¹³ Pirwasninchejqa tukuy imaymana mikhunaswan junt'a kanku. Uywasninchejqa jallp'asninchejpi waranqa waranqasta mirarinku.

¹⁴ Wakasninchejqa llank'anapaj kallpayojllapuni kanku, mana ni pi manchachikuspa qhaparinchu callesninchejpi.

¹⁵ Kusikuyniyojmin ajina kaj aylloqa, kusikuyniyojmin chay jina Señor Diosniyoj aylloqa.