Salmos 143 - Qheshwa Biblia DC

Qampi atienekuyki

¹ Señor, uyariway mañakuyniyta, allinta uyariway mañakususqayta. Uyarimuway, qan cheqa kasqaykirayku, cheqan kasqaykiraykutaj.

² Ama juicioman wajyaychu kamachiykitaqa, ñaupaqeykipeqa mana pipis mana juchayojqa kanchu.

³ Enemigosneyqa qhatiykachawanku, ñat'uspa pampaman ch'allpawanku, laqhapi tiyachiyta munawanku, unayña wañusqata jina.

⁴ Ancha llakisqa kani, sonqoypi iskayrayasqa kani.

⁵ Ñaupajmanta yuyarikuni, tukuy ruwasqasniykipi yuyarikuni.

⁶ Qanman makisniyta oqharini, qanmanta ch'akichikuni ch'aki jallp'a jina.

⁷ Usqhayllata, Señor, uyariway, samayniy tukukapushanña, ama yanapayniykita qhechukapuwaychu, manachayqa wañusqa jinachá kayman ari.

⁸ Tutamanta munakuyniykimanta yachachiway, imaraykuchus qampi atienekuyki; kausanayta yachachiway, imaraykuchus tukuy sonqoywan qanllaman chimpamuyki.

⁹ Señor enemigosniymanta libraway, pakakuyta qampi mask'ani.

¹⁰ Munayniykita ruwayta yachachiway, qan Diosniy kasqaykirayku. Qampa sumaj kayniyki cheqan ñanta pusawachun.

¹¹ Señor, sutiykirayku kausachiway, cheqan kasqaykirayku llakiymanta orqhoway.

¹² Khuyakuyniykirayku enemigosniyta tukuchiy, tukuy enemigosniyta chinkachiy, noqa kamachiyki kasqayrayku.