Salmos 141 - Qheshwa Biblia DC

Sajramanta waqaychasqa kanapaj mañakuy

¹ Señor qanta qhaparikuyki, usqhayllata jamuy, wajyakusojtiy uyariway.

² Mañakususqayqa ñaupaqeykipi inciensoj q'apaynin jina kachun. Qanman makisniyta oqharisqaytaj inti yaykuy horasta jaywana jina kachun.

³ Señor, uj qhawajta simiyman churaway; ama saqeychu simiy sajrata parlananta.

⁴ Yuyayniymanta sajra imasta karunchaway, amataj saqewaychu sajra imasta ruwajta, nitaj saqewaychu millayta ruwajkunawan qhochukusninkupi ujchakunayta.

⁵ Cheqan runaj jasut'iwasqanqa allimpaj kanqa, k'amiwasqanqa k'acha q'apaj jampi jina kanqa. Chaykunata mana noqaqa qhesachanichu. Jasut'iwajtinkupis chay runaspajqa Diosmanta mañapullasajpuni.

⁶ Juezkunasninku qaqaman wijch'usqas kanqanku, chaypacha yachanqanku palabrasniyqa cheqan kasqanta.

⁷ Jallp'ata qhollispa phanchachinchej, ajinata tullusninchej sepulturaj simimpi qhallasqa kanqa.

⁸ Señor, Señorníy, ñawisniy qan qhawarisqas kanku, qampi atienekuni amataj saqerpariwaychu.

⁹ Tojllata churapuwasqankumanta jark'away. Sajrata ruwajkunaj ch'ipanmanta jark'away.

¹⁰ Sajra runasqa kikin tojlla churasqallankupitaj ujllapi urmachunku, noqataj ñaupajllamampuni risaj.