Salmos 140 - Qheshwa Biblia DC

Diospa yanapayninta mañakuspa

¹ Señor, sajra runasmanta libraway, maqaj runamanta jark'away.

² Sajra ruwayllatapuni yuyajkunamanta, sapa p'unchaytaj maqanakuta mask'ajkunamantapis.

³ Paykunaqa katari jina qallunkuta sik'imunku, parlasqankutaj cascabel katarej venenon jina.

⁴ Señor, jark'away sajra runaspa makinmanta, libraway maqanakoj runasmanta, paykunaqa misk'anata noqapaj wakichinku;

⁵ may kasqankuta yuyakoj runas tojllata wakichipuwanku, ch'ipasta, lazostawan ñanniyman churanku.

⁶ Noqa Señorta nini: Qan Diosniy kanki, qhaparispa mañakususqayta, Señor, uyarillaway.

⁷ Señor, Diosníy, qanmin kanki jatun atiyniyoj salvawajniy, umayta maqanaku p'unchaypi qan jark'anki.

⁸ Señor, sajra runasman mañasqankutaqa ama qoychu, paykunaj yuyasqankuta junt'akunantaqa ama saqeychu, jatunchakuspa umankuta ama oqharinankupaj.

⁹ Muyuykuwajkunamanqa contraypi sajra parlasqallankutaj chayachun.

¹⁰ Paykunaj patankuman nina brasas chayachun, mana llojsimuy atina t'oqoman urmaykuchunku, chaymantataj ni jayk'aj llojsimuyta atenqankuchu.

¹¹ Ch'ichi simeqa ama kay pachapi sayachunchu, runa maqajtaqa mana allin qhatirichun, chinkarichuntaj.

¹² Noqa yachani Señorqa wajchaspaj justiciata ruwasqanta, llakisqa runasmantaj maychus kajta qosqanta.

¹³ Cheqan runasqa sutiykita yupaychanqanku, cheqan kausayniyojkunataj ñaupaqeykipi kausanqanku.