Salmos 139 - Qheshwa Biblia DC

Diosqa tukuyta yachan

¹ Señorníy qan allinta qhawawanki, rejsiwankitaj.

² Tukuy ruwasqasniyta qan yachanki. Yuyasqaytaqa karumantapacha qan yachanki.

³ Qan yachanki purisqayta samarikusqaytapis, yachankitaj tukuy ruwasqayta.

⁴ Manaraj parlashajtiy, qan, Señor, ñapis yachankiña.

⁵ Tukuynejmanta muyuykuwanki, makiykitataj patayman churaykuwanki.

⁶ Yachayniykeqa ancha jatun noqapajqa, mana yachanaypaj jinachu, chay jina jatun, mana unanchayta atinichu.

⁷ Qanmanta maymantaj ayqekuyman, ñaupaqeykimanta maymantaj ayqekuyta atiyman?

⁸ Janaj pachaman wichariyman chayqa, chaypi qan kanki. Jallp'a ukhuman yaykuyman chaypis, chaypipis qan kashallankitaj.

⁹ Sut'iyamojmanta lijranta mañakuspa phawayman, inti yaykuynejpi mar qochaj tukukuynimpi tiyakuyman chaypis;

¹⁰ chaypipis makiykeqa taripawanman, paña makiykeqa mana kachariwanmanchu!

¹¹ Laqhapi pakakuyta yuyayman chaypis, tutaqa muyuyniypi k'ancharenqa.

¹² Laqhapis mana qanmanta pakawanmanchu, tutatapis k'anchaypis, laqhapis kikillan.

¹³ Qanmin tukuy ukhuyta ruwawarqanki. Mamaypa wijsampeqa qampuni ruwawarqanki.

¹⁴ Yupaychayki, imaraykuchus chay jina sumajta ruwasqaykeqa; chaytaqa sumajtaña yachani.

¹⁵ Qampajqa mana pakasqachu karqa ukhuy wiñasqanqa, pakaypi ruwasqa kashajtiypis, ukhu jallp'a urapi ruwakusharqani chaypacha.

¹⁶ Ñawisniykeqa imaynatachus ukhuy ruwakushajtin rikorqaña, tukuy chay imastaj libroykipi qelqasqaña karqanku, chaykunataj tukuynimpuni ruwasqas karqanku.

¹⁷ Diosníy, ancha sumajpuni yuyaykunasniykeqa, tukuynenqa mana yupay atinaqa.

¹⁸ Noqa yupayta munayman chayqa, t'iyumanta aswan ashkhaman tukunman. Rijch'arispapis qanllawampuni kashani.

¹⁹ Diosníy, sajra runaspa kausayninta qhechuy, noqamanta runa wañuchista karunchay.

²⁰ Paykunaqa sajrata qanmanta parlanku, qhasillasta contraykipipis oqharikunku.

²¹ Señor, chejnikusojkunata manachu chejnikuni, contraykipi oqharikojkunapaj manachu phiñakuni?

²² Paykunata chejnisqata chejnikuni, enemigosniypaj qhawani.

²³ Diosníy, allinta sonqoyta qhawariway, yachay sonqoyta, tukuy yuyasqayta allinta yachaway.

²⁴ Qhaway, sajra ñantachus purishani, wiñay ñantataj pusaway.