Salmos 138 - Qheshwa Biblia DC

Graciasta qonapaj takiy

¹ Señor, tukuy sonqoywan graciasta qosqayki, dioskunaj ñaupaqempitaj qanman takisqayki.

² Santo wasiykej ñaupaqempi qonqorikusaj, khuyakuyniykimanta cheqa kayniykimantawan, imaraykuchus sutiykita, palabraykitawan tukuy imasmanta astawan pataman churarqanki.

³ Wajyakushajteyqa uyariwarqanki, kallpaykiwantaj kallpachawarqanki.

⁴ Señor mundontinmanta reykuna yupaychasonqanku, ruwasaj nisqaykita uyarispa.

⁵ Señorta yupaychanqanku sumajta yuyasqanrayku, imaraykuchus Señorpa k'anchaynenqa jatunmin.

⁶ Aswan patapipis Señorqa kachun, llamp'u sonqosta qhawamumpuni, may kasqankuta yuyakoj runastataj karumanta rejsin.

⁷ Llakiy chaupipi rikukojtiy, qan kausayta qollawankipuni; atiyniykiwan salvawanki, jinallataj enemigosniypa phiñakuyninmantapis.

⁸ Señorqa noqapaj ruwasaj nisqanta junt'anqa. Señor, khuyakuyniykeqa wiñaypajmin, qallarisqaykitaqa ama jinapi saqerpariychu!