Salmos 124 - Qheshwa Biblia DC

Diosqa ayllunta jark'an

¹ Sichus Señor mana noqanchejwan kanman karqa chayqa, kunan nichun Israelqa,

² manachus noqanchejwan Señor kanman karqa chayqa, chay runas contranchejpi oqharikojkuna,

³ kausashajtataj oqoykuwasunman karqa, contranchejpi k'araj phiñakuyninkupi kashaspa.

⁴ Chaypacha, mayus apawasunman karqa. Yakus chinkachiwasunman karqa.

⁵ Chaypacha ashkha chayamoj yaku patanchejta wasarinman karqa.

⁶ Señorqa jatunchasqa kachun, pay mana saqerqachu enemigosninchej tukuchinawanchejta.

⁷ Tojlla churasqankumanta ayqekorqanchej, imaynatachus uj p'isqo ayqen ajinata. Chay tojlla churasqankutaj p'itikorqa, noqanchejtaj llusp'erqanchej.

⁸ Yanapayninchejqa Señormanta chayamuwanchej, pichus janaj pachata kay pachatawan ruwajmanta.