Salmos 12 - Qheshwa Biblia DC

Diospa yanapayninta mañakunamanta

¹ Salvawayku Señor, imaraykuchus kaypeqa manaña kanchu cheqanta ruwajqa, nillataj kanñachu cheqan sonqoyoj runas.

² Paykuna pura llullanakunku, mana kajta ch'aukiyanakunku, puraj uyastaj kanku.

³ Saphimanta paykunata t'iray Señor, chay puraj uyasta, chay jatunchakojkunata.

⁴ Chay nejkunata: Simillanchejwanqa tukuy imata tarisunman, allintachus parlasunman chayqa. Pitaj ch'inyachiwasunmanri?

⁵ Señorqa kay jinata nin: Pisi kallpayojkunaqa saruchikunku, wajchasrí nanaywan waqakunku, noqataj jatarikuspa yanapasaj, imaraykuchus chayta chhikata suyashanku.

⁶ Señorpa qosqayki nisqan, palabrasqa ch'uwa llimphuchasqa qolqe jina, mayqenchus qanchis kutita ninapi ch'uwachasqa.

⁷ Qanqa Señor qhawawasqaykupuni, waqaychawasqaykutaj chay runasmanta.

⁸ Sajra runasqa tukuynejta muyuykachanku, mundontintaj sajra runastaqa jatunchanku.