Salmos 115 - Qheshwa Biblia DC

Diosqa ujllamin

¹ Señor, qan kikiykita jatunchakuy, ama noqaykutaqa; jatunchakuy khuyakuyniykirayku cheqan kayniykiraykutaj.

² Imaraykutaj Diosta mana qhatejkuna taponqankuri. Maypitaj Diosninku kunan kashanri?, nispa.

³ Diosninchejqa janaj pachapi kashan; Pay tukuy munasqanta ruwarqa.

⁴ Paykunaj lantisninkoqa qolqemanta, qorimantataj kanku, chaykunaqa runaj ruwasqasnillan kanku.

⁵ Simiyoj kanku manataj parlankuchu, ñawisniyoj kanku, manataj rikunkuchu;

⁶ ningrisniyoj kanku manataj uyarinkuchu; senqayoj kanku, manataj muskhinkuchu.

⁷ Makisniyoj kanku, manataj llankhankuchu; chakisniyoj kanku manataj purinkuchu, ni uj simillatapis parlarinkuchu.

⁸ Chay qhasi dioskunata ruwajkunaqa chaykunaman rijch'akunku, tukuy chaykunapi creejkunapis.

⁹ Israelitas, Señorpi atienekuychej, pay yanapawanchej, jark'awanchejtaj.

¹⁰ Sacerdotes, Señorpi atienekuychej. Pay yanapawanchej, jark'awanchejtaj.

¹¹ Qankuna Señorta yupaychajkuna, Señorpi atienekuychej. Pay yanapawanchej jark'awanchejtaj.

¹² Señor noqanchejmanta yuyarikun, bendiciwasuntaj! Israelitasta bendicenqa, sacerdotestapis bendicenqa.

¹³ Señorqa kasukojkunasninta bendicenqa, jatuchajta, juch'uychajtapis.

¹⁴ Señorqa qankunata ashkhayachichun, jinallataj wawasniykichejtapis.

¹⁵ Janaj pachata, kay pachatapis ruwaj Señorqa, qankunata bendicichun.

¹⁶ Janaj pachaqa Diosninchejpata, jallp'atataj runaman qorqa.

¹⁷ Wañusqakunaqa jallp'aman yaykuspa, manaña Señorta yupaychayta atinkuchu.

¹⁸ Noqanchejtaj Señorta yupaychasunchej kunanmanta wiñaykama. Señorqa yupaychasqa kachun.