Salmos 109 - Qheshwa Biblia DC

Diosninchejmanta justiciata mañakuy

¹ Diosníy, ama ch'inlla qhepakapuychu, mañakushajtiy.

² Llulla runas, sajra runaspis, noqaj contraypi parlanku, llullakuspataj mana kajta parlanku.

³ Chejnikuy palabraswan muyuykuwanku, mana imallamanta maqanakoj sayaykuwanku.

⁴ Paykunata munakushajtiypis, mana allinwan kutichiwanku. Chaywampis, paykunapaj Diosmanta mañapuni.

⁵ Allin ruwasqaymanta sajra kajwan kutichiwanku, munakuyniymantaj chejnikuywan kutichiwanku.

⁶ Paypa contrampi uj sajra runata churay, paypa paña ladompitaj uj ch'ataykojta churasaj.

⁷ Justiciapitaj juchachasqa llojsichun, Diosmanta mañakusqampis juchallampajtaj kachun.

⁸ Pisi watasllata kausachun, wajtaj jap'ichun kapuyninta.

⁹ Wawasnenqa wajchas qhepakunku, warmimpis viuda qhepakuchun.

¹⁰ Wawasnenqa mañakuspa purejkuna kachunku, thuñisqa wasinkumantapis wijch'uchunku.

¹¹ Manoj runa tukuy kapuyninkuta qhechuchun. Tukuy llank'asqankutapis wajkuna apakapuchun.

¹² Ama pipis paymanta khuyakuchunchu, nitaj wajcha wawasninmantapis.

¹³ Miraynimpis tukukapuchun, sutintaj wiñaypaj chinkachun.

¹⁴ Tatampa sajra ruwasqanmanta Señorqa yuyarichumpuni, mamampa juchantapis Señorqa amapuni pampachachunchu.

¹⁵ Señorqa juchasninkuta amapuni qonqachunchu, kay pachapitaj sutinkutaj wiñaypaj qonqasqa kachun.

¹⁶ Payqa ni jayk'ajpis khuyakuyta yuyarqachu, aswampis wajchasta, llamp'u sonqo kajkunatapis qhatiykacharqa, llakiypi kajkunatapis wañuchinankupaj.

¹⁷ Maldicionta mask'an chayqa, maldicisqa kachun. Bendicionta mana munarqachu chayqa, ama jap'ichunchu.

¹⁸ Maldicionqa p'achan jina kachun, ukhu tullusninman yaykuchun, yaku jina, aceite jinataj.

¹⁹ Chayqa p'achan jinapuni payta qhataykuchun, chumpi jinapunitaj mat'ichun.

²⁰ Ajinata Señorqa enemigosninman kutichichun, pikunachus noqapaj sajrata parlajkunaman.

²¹ Qantaj, Señor Diosníy, sutiykirayku allinta qhawaway; salvaway k'acha khuyakuyniykirayku.

²² Wajcha kani, llakisqataj. Sonqoyqa p'akisqa kashan.

²³ Llanthu jina chinkapushani, wayraj apaykachasqan jina kani.

²⁴ Mana mikhusqayrayku, chaki moqosniy kharkatitiwan; mikhunamanta jinataj tulluyashani.

²⁵ Runaj asikunan kani, rikuwaspataj umankuta khiwispa asipayawanku.

²⁶ Señor Diosníy yanapaway, khuyakuyniykiman jinataj salvaway.

²⁷ Paykunaqa yachachunku qanqa Señor, makiykiwan chayta ruwasqaykita.

²⁸ Paykunaqa maldiciwachunkupis, qanqa bendicillawankipuni. Contraypi oqharikojtinkupis p'enqachisqas kachunku, kausaqeykitaj kusisqallapuni kachun.

²⁹ Enemigosneyqa p'enqaypi rikhurichunku, poncho jinataj p'enqayta qhataykukuchun.

³⁰ Simiywantaj Señorman graciasta qosaj, ashkha runaspa chaupimpitaj payta yupaychasaj.

³¹ Payqa wajcharayku sayan, juchachayta munajkunamanta salvan.