Salmos 104 - Qheshwa Biblia DC

Diosqa tukuy ruwasqasninta waqaychan

¹ Noqaqa sonqoywan Señorta yupaychasaj. Señor Diosníy, may jatunmin kanki. Atiywan, k'anchaywantaj p'achallisqa kanki.

² K'anchaywan qhatasqa jina kanki. Janaj pachata uj toldota jina sayachinki.

³ Yaku patapi, alto tiyakunaykikunata wasichanki. Phuyusqa carrosniyki jina kanku: wayraj lijrampi purinki.

⁴ Wayras kachasniyki kanku. Ninaj qallusnin qanta kasusunku.

⁵ Mundota sinch'ita sayachinki, mana jayk'aj pachanmanta kuyunampaj.

⁶ Kay pachata yakuwan p'achallichinki, yakusrí orqo kinraykunaman chayanku.

⁷ K'amisqaykitawan yakus ayqerqanku. Qhon qhonniykitawan uyariytawan, usqhayllata yakus riporqanku.

⁸ Orqosman wicharerqanku. Pampasmantaj uraykorqanku. Maymanchus señalarqanki, chay cheqanman rerqanku.

⁹ Yakusman mojonesta churarqanki, mana chayta pasanankupaj, manaña jallp'ata p'ampaykunampaj.

¹⁰ Pampaspi juturista rikhurichinki wayq'osta rinankupaj.

¹¹ Chay mayusmanta tukuy k'ita animalkuna ujyanku. Chaypi k'ita burrospis ch'akiyninkuta thasnunku.

¹² Chay cantospi p'isqospis thapachakunku, sach'asnimpitaj takinku.

¹³ Pata tiyanaykimantapacha orqosta qarpanki. Ruwasqasniykej poqoyninwan jallp'a sajsakun.

¹⁴ Qhorasta p'utuchinki animalkunapaj. Runapajtaj plantasta p'utuchinki, chaymanta mikhunata tarinampaj,

¹⁵ vinota sonqonta kusichinampaj, aceiteta uyanta lliphipichinampaj, t'antatarí kallpachakunampaj.

¹⁶ Señorpa sach'asnin yakuwan sajsakunku. Libanopi paypa kikin cedro sach'as plantasqasnin.

¹⁷ Chay sach'aspi p'isqos thapachakunku, chay pino sach'as puntaspitaj cigüeñas nisqa thapachakunku.

¹⁸ Orqo puntaspi k'ita cabras kausakunku. Qaqaspitaj wisk'achas pakakunku.

¹⁹ Qan killata ruwarqanki wataj tiemposninta yupananchejpaj. Intipis yachan ima horachus yaykunanta.

²⁰ Qan tutata apachimunki laqha kanampaj. Chaypachataj k'ita animalkuna puriykachanku.

²¹ León uñas yarqhaymanta waqanku. Diosmanta mikhunata mañakunku.

²² Inti laqhayamojtintaj riripunku, jusk'usninkumantaj winkoj yaykupunku.

²³ Chanta runa llank'aj llojsin, chajrasninkupi ch'isiyaykuykama ruwaj.

²⁴ Señor, ruwasqasniykeqa may chhika. Tukuy imata yachayniykiwan ruwarqanki. Jallp'aqa ruwasqasniykiwan junt'a kashan.

²⁵ Jaqaypi may jatun mar qocha kashan, tukuynin mana rikukunchu, chaypi mana yupay atina tukuy laya challwas t'impurishanku jatuchaj, juch'uychaj ima.

²⁶ Chaypi barcosqa kayman jaqayman rinku. Jatun challwa Leviatampis, mayqentachus chaypi phujllanampaj ruwarqanki.

²⁷ Tukuyninku suyanku qan mikhunata horampi qonaykita.

²⁸ Qan mikhunata qonki, paykunataj pallakunku. Makiykita kicharinki, paykunataj allin kajwan sajsakunku.

²⁹ Uyaykita pakanki chayqa, mancharikunku. Samayninkuta qhechupojtiykitaj wañupunku, jallp'allamantaj tukupunku.

³⁰ Espirituykita kachamunki chayqa, chaykuna ruwanku, kay pachatataj mosojman tukuchinki.

³¹ Diospa atiynenqa mana tukukunchu, ruwasqampitaj Señorqa kusikun.

³² Señor qhawarejtin jallp'aqa kharkatin, llankharejtintaj orqosqa q'osñirinku.

³³ Noqataj kausayniyoj kanaykamaqa, Señor Diosniyman takiykunata takisaj.

³⁴ Yuyasqasniy paypaj sumaj kachun; payllapi tarini kusikuyta.

³⁵ Sajra runasqa kay pachamanta chinkachunku; juchasapasqa amañapuni kachunkuchu. Noqaqa tukuy sonqoywan Señorta yupaychasaj. Yupaychasqa kachun Señorqa.