Salmos 102 - Qheshwa Biblia DC

Llakisqa runaj mañakuynin

¹ Señor mañakusqasuyta uyariway. Señor, saqellay qanman qhaparikusqay chayamunanta.

² Ama uyaykitaqa pakakuwaychu; llakisqa kashajteyqa uyarillaway ari; usqhayllata kutichiway wajyakusojteyqa.

³ Kausayniy q'osñi jina tukukushan. Tullusniypis nina jina sayarishan.

⁴ Sonqoyqa nanasqa, ch'akisqa qhora jina; mikhuypis mana jap'iwanchu.

⁵ Aycha qarayqa tullusniyman k'askaykun, chhikata waqasqaypi.

⁶ Ch'in pampapi p'isqo jina kani, raqaykunapi ch'useqa jina.

⁷ Mana puñunichu, wasi patata phawaykachashaj p'isqo jina kani.

⁸ Enemigosneyqa sapa p'unchay alqochakuwanku; sutiytataj oqharispa sajrata contraypi parlanku.

⁹ Chayrayku ushphata mikhuni t'antata jina, waqayniyta ujyani.

¹⁰ Phiñakusqaykirayku, sinch'i k'ajajta phiñakusqaykiraykutaj, qan oqhariwarqanki, wijch'uwarqankitaj.

¹¹ Kausayneyqa llanthu jinalla chinkapushan, qhora jinataj ch'akipushani.

¹² Qantaj, Señor, wiñaypaj sayanki, sutiykeqa yuyarisqallapuni kanqa.

¹³ Sayarikuspa Sionmanta khuyakunki. Tiempoña khuyakuyniykeqa, junt'akunña perdonanaykipaj horaqa.

¹⁴ Kamachisniykeqa thuñisqa rumisninkutapis munakunku. Raqaykunasta rikuspa, sonqonku nanan.

¹⁵ Chanta tukuy naciones Señorpa sutinta manchachikonqanku, kay pachamanta tukuy reyes Señorpa sumaj sutinta yupaychajtinku;

¹⁶ Sionta watejmanta Pay sayachejtin, may atiyniyoj rikhurimojtin.

¹⁷ Mana piniyojpa mañakusqanta uyarejtin; mañakusqanmantapis dakojtintaj.

¹⁸ Kayqa qelqasqa qhepakuchun, qhepa runas yachanankupaj, qhepata nacekojkunapis Señorta yupaychanankupaj.

¹⁹ Señorqa janaj pacha tiyananmanta qhawamorqa. Janaj pachamanta pacha kay pachata qhawamorqa.

²⁰ Presochasqas kanku, chaykunaj waqayninta uyarinampaj, wañunankupaj juchachasqastataj kacharichinampaj.

²¹ Sión Jerusalén llajtapi, Señorpa sutin rejsichisqa, yupaychasqataj kanampaj.

²² Tukuy runas naciones tantakuspa, Señorta yupaychajtinku.

²³ Wayna kashajtillayraj pay kallpayta qhechuwan, pisi kausayniyojtataj ruwawan.

²⁴ Noqa nini: Diosníy, ama khuskan kausaynillaypi apakapuwaychu. Qampa kausayniykeqa mana tukukunchu.

²⁵ Qallariymantapacha kay pachata qan sinch'ita sayachinki, cielotapis qanllataj ruwarqanki.

²⁶ Tukuy kay imasqa chinkaponqanku, qantaj wiñaypaj sayanki, tukuy chay imastaj p'acha jina thantakunku, qantaj p'achata jina mudanki, mudasqataj kanqanku.

²⁷ Qantaj kikillampuni kanki, watasniykeqa ni jayk'aj tukukunchu.

²⁸ Qan kamachiykej mirayninta yanapanki, ñaupaqeykipitaj paykunata allinta purichinki.