Salmos 101 - Qheshwa Biblia DC

Diospaj cheqanta kausanamanta

¹ Munakuyniykimanta cheqan kayniykimantawan takisaj; arí, Señorníy qanman takisaj.

² Cheqanta kausayta munani. Mayk'ajtaj noqaman jamunkiri? Kausayniy mana ima nina kanqa, jatun palaciopi kajtiypis.

³ Ni jayk'ajpis qhawasajchu sajra runastaqa. Diosta mana kasojkunaj ruwasqanta chejnikuni, mana jayk'ajpis chaykunataqa qayllaykuchikamusajchu.

⁴ Sajra yuyaykunaqa noqamanta karunchakuchunku. Mana ima sajratapis ruwayta munanichu.

⁵ Noqaqa chinkachisaj, pakayllamanta runa masinkupaj rimajkunata; runaykachajkunata, wapu wapu kajkunatawan mana rikuyta atinichu.

⁶ Cheqan kajta junt'ajkunata allimpaj qhawasaj, noqawan kausanankupaj; cheqan ñanta purejqa noqaj kamachiy.

⁷ Ch'aukiyaj runaqa palacioypi mana tiyakonqachu; llullata parlaj runaspis, mana ñaupaqeypi kanqachu.

⁸ Sapa paqarin kay jallp'api juchasapasta chinkachisaj. Señorpa llajtanmanta tukuy chay sajra ruwajkunata wijch'usaj.