Rut 3 - Qheshwa Biblia DC

Boozpa k'acha kaynin

¹ Uj kutipi, Noemí nerqa Rutman nispa: Wawáy, mask'apunasuy kanqa uj qosata qanta kusichisojta.

² Qhaway ayllunchej Booz kunan ch'isi renqa eraman pajamantataj cebadata ch'uwachanqa uywaqesninwan llank'amorqankichej chaypi.

³ Kay nisqayta ruwanki: Sumajta mayllarqokuy, q'apaj jampiwantaj jawikuspa mosoj p'achaykita churaykukuy chantá riy payman. Ama Boozwan rejsichikunkichu mikhuyta ujyaytataj tukunankama.

⁴ Sumajta qhawakunki maypichus puñusqanta. Chantaqa chakisninmanta q'alalaspa chayman siriykunki. Chaypacha pay kikinmanta nisonqa imatachus ruwanaykita.

⁵ Chaypacha Rut kuticherqa nispa: Tukuy niwasqaykita ruwasaj.

⁶ Rutqa riporqa chajraman, Noeméj tukuy nisqantataj ruwarqa.

⁷ Boozrí, mikhorqa ujyarqa maytataj kusikorqa sonqompi. Chaymantataj puñunampaj siriykakaporqa era qollu cantopi. Chay qhepantataj Rut ch'insitullamanta chayamuspa chakisninmanta q'alalaspa chaypi puñuykorqa.

⁸ Chaupi tutata Boozqa jinallamanta puñuymanta rijch'arisqa, wasan ladoman kutirikoj jinataj chakisnin chaypi uj warmi sirisqata rikuspa mancharikorqa.

⁹ Pitaj kanki?, nispa Boozqa taporqa. Paytaj kuticherqa: Kamachiyki Rut kaneqa, nispa. Qan aswan qaylla aylluy kanki, chayrayku waqaychanawayki tiyan, munani noqawan casarakunaykita.

¹⁰ Señor bendicisuchun!, nispa nerqa Boozqa. Kunan qan rikuchiwarqanki wañoj qosaykita mana wasanchaj kasqaykita. Qan munaspaqa mask'akuwaj karqa qosaykipaj, noqamanta aswan joventa wajchata, chayri qhapajtapis, jinapis mana chayta ruwarqankichu.

¹¹ Ama manchachikuychu wawáy, kay llajtapi tukuyña yachanku qan cheqa maychus kaj warmi kasqaykita. Chayrayku kunan mañawasqaykita ruwasaj.

¹² Chaywampis, arí cheqan qaylla aylluyki kasqayqa, jinapis noqamanta aswan qaylla aylluyki kallantaj.

¹³ Kaypi qhepakuy kunan tuta. Sichus pay q'aya munanqa ayllu jina ruwanasninwan junt'ayta chayqa, ruwachun; mana ruwanman chayri, Diospa ñaupaqempi niyki noqa ruwanayta. Kunanqa puñukapuy paqarimunankama.

¹⁴ Rut chay tuta puñukaporqa Boozpa chakisnimpi. Q'ayantintaj allin tuta tuta manaraj sut'iyashajtin jatarikorqa, imaraykuchus Booz nisqa: Mana ni pi yachananchu kay warmi chajra pataman jamusqanta, nispa.

¹⁵ Chaypacha Booz nillarqataj: Orqhokuy mantaykita, sumajtataj jap'inki, nispa. Rut mantanta jap'ishajtin Boozqa cebadata jich'aykorqa tawa chunka kilosmanta aswan ashkhata. Chantá q'epiriykuchejtinkama riporqa llajtaman.

¹⁶ Rut suegrampaman chayajtinkama, kay jinata tapurerqa: Imaynataj risorqa wawáy?, nispa. Ruttaj willakorqa Booz tukuy imasta paypaj ruwasqanta.

¹⁷ Chantá nillarqataj: Kay tukuynin cebadata qowarqa, mana ch'usaj maki suegraykiman kutipunaykipaj, nispa.

¹⁸ Chaypitaj Noemí kuticherqa, nispa: Kunanqa wawáy, suyariy imachus kananta. Kay runaqa mana samanqachu chay ruwasqasninta allinman sut'inchanankama.