Rut 2 - Qheshwa Biblia DC

Rut, Boozpa chajrasnin patapi

¹ Noemejta karqa uj ayllun Elimelec qosanmanta Booz sutiyoj. Payqa uj atiyniyoj qhapaj runa karqa.

² Uj p'unchaypirí Rut nerqa Noemiman nispa: Saqeway chajra patasman rejta, ichachus mayqen ruthojllapis cebada umasta chajmakojta saqewanman. Rillay waway, nispa suegranqa kuticherqa.

³ Jinataj Rutqa rerqapuni chajras pataman, chaypitaj cebada umasta chajmakoj churakorqa. Chay chajratajrí, Elimelecpa ayllunmanta Boozpata kasqa.

⁴ Jinallamanta Boozqa Belenmanta chayaykamusqa, napaykorqataj ruthojkunasninta: Señor qankunawan kachun!, nispa. Señor qanta bendicisuchun, nispataj kuticherqanku.

⁵ Chantá Boozqa tapurerqa chay ruthojkunasnimpa kamachejninkuta: Ima pejpatataj chay sipasri?, nispa.

⁶ Chay kamachejtaj kuticherqa: Uj moabita, Moab jallp'amanta Noemiwan jamorqa chay.

⁷ Pay mañakuwarqa ruthojkunaspa qhepankuta rinanta cebada umasta chajmakuspa. Tukuy paqarintañataj llank'an, chaymanta kunampis samarikoj jamun.

^8-9 Chaypacha Booz nerqa Rutman: Uyariy wawáy. Ama cebada umasta chajmakoj rinkichu ni pi wajkunaj chajrankuman. Kaypi qhepakuy kay sipas kamachisniywan, chantá qhatillanki maypichá ruthojkunata rikunki chayman. Ña kamachiniña uywaqesniyta ama imatapis ninasunkuta qanta, ch'akisojtinri jaqay wich'is chayman rillanki yakuta orqhoshanku chaymantapis ujyakullanki.

¹⁰ Ruttaj pampakama k'umuykorqa respetonta rikuchispa, Booztataj taporqa nispa: Imaraykutaj noqata qhawakuwanki, may k'achataj qan noqapaj kanki mana kay llajtayoj kajtiypis?

^11-12 Booz kuticherqa: Qosayqej wañupusqanmantapacha suegraykiwan imatachus ruwasqaykita yachani, tatasniykita chantá llajtaykitapis saqesqaykita noqaykuwan kausakoj jamunaykirayku, mana rejsisqas kashajtiykupis. Dios pagarapusuchun! Israelpa Señornin Diosnintaj pejpa makisnimpichus pakakorqanki chaymin qopusuchun tukuy ruwasqaykimanta!

¹³ Paytaj kuticherqa: Ancha khuyakuyniyoj noqapaj kanki, parlawasqaykitaj aswanta kallpachawan. Ima misk'ita parlawanki, noqaqa mana ujnin uywaqeyki jinallapischu kani.

¹⁴ Mikhunankupaj Booz wajyarqa Rutta, nerqataj: Jamuy kayman, jap'irikuy uj chhikan t'antata, chay k'allku vinowan chhapuspataj mikhurikuy. Rutqa tiyaykukorqa ruthojkunawan khuska, Booztaj jaywarerqa cebada jank'ata. Payrí mikhorqa sajsakunankama puchurerqarajtaj.

¹⁵ Chantá watejmanta cebada umasta chajmaj rillarqataj, Booz kamacherqa uywasqasninta: Saqellaychej cebadata chajmakojta chay q'apis ukhumantapis ama jark'akunkichejchu.

¹⁶ Maki q'apisniykichejmanta urmachikuychej pay oqharikunampaj chajmakoj jina. Ama pipis rimachunchu!

¹⁷ Boozpa chajrampi Rutqa ch'isiyamunankama chajmakorqa. Chay pallakusqan cebadataj iskay chunka kilos jinaman muchhakorqa.

¹⁸ Ajinaqa kutiporqa llajtanman cebada q'epirisqa chayaspataj suegranman rikucherqa. Qhepantataj orqhorqa q'epinmanta mikhuna puchusqanta, Noemimantaj qorqa.

¹⁹ Maypitaj kunan llank'amorqanki? nispa, Noemí taporqa. Maypitaj chay chhikata pallarqankiri? Allin qhatirichun pichus chay jinatapuni yanapasorqa chayta! Rut willarqa suegranman pejpapichus llank'asqanta. Piwanchus llank'arqani chay runaj sutenqa Booz, nerqa.

²⁰ Noemitaj kuticherqa: Señor payta khuyakuchun! Payqa may khuyakuyniyoj noqanchejpaj karqa, jinataj wañupunkuña chaykunawampis. Chay runaqa qaylla ayllunchej, chayrayku noqanchejta waqaychanawanchej tiyan.

²¹ Rut chaypi nillarqataj: Nillawarqataj chay warmi uywaqesninwan llank'anallaytapuni, ruthuy tukukunankama.

²² Chaypacha Noemí kuticherqa qhachuninman, nispa: Wawáy, walejman rijch'awan uywaqesninwan qhepakunaykeqa, mana waj chajrasman rispa, jinamanta mana piwampis rimachikunaykipaj.

²³ Jinataj Rutqa cebada jinataj trigo umasta pallakullarqapuni warmi uywaqesninwan khuska chay ruthuykunas tukukunankama. Chaykamari suegranwan khuskallapuni tiyakorqa.