Romanos 9 - Qheshwa Biblia DC

Dios ajllan israelitasta

¹ Cheqata Cristo Jesuspi niykichej mana llullakuspa. Concienciaypis willashan Santo Espiritupi cheqatapuni nisqayta.

² Jatun llakiyniy tiyan, sonqoypitaj mana tukukoj nanay.

³ Noqa kikiy munayman maldicisqa kayta, Cristomanta t'aqakuspa wauqesniyta munakusqayrayku; pikunachus aychaman jina ayllusniy kanku.

⁴ Paykuna kanku israelitas, pikunatachus Dios wawasnimpaj jina rejsikaporqa; paykunamantaj jatun kayta qorqa, tratotataj paykunawan ruwarqa; chantá qorqa leyta, templopi Diosta yupaychayta, qosqaykichej nerqa chaykunatawan.

⁵ Ajinaqa, paykunaj ñaupa tatasnin karqanku; aychaman jinataj paykunamanta Cristo jamorqa. Payqa tukuy imapi, paytaj Dios, yupaychasqataj kachun wiñaypa wiñayninkama. Amén.

⁶ Diospa palabranqa mana pantayta atinchu; astawanqa Israelpa mirayninmanta kajkunaqa, mana tukuychu israelitas kanku.

⁷ Manataj tukuyninkuchu, Abrahampa mirayninmanta kasqankurayku, Diospa wawasnin kanku. Astawanqa nerqa: Isaacnejta mirayniyki kapusonqa, nispa.

⁸ Kaymin chayqa: Aychaman jina kajkunaqa mana Diospa wawasninchu kanku, manachayqa Diospa qosqayki nisqanman jina kajkunalla Diospa wawasnin kanku. Paykunataj cheqa kaj miraywan khuska yupasqas kanku.

⁹ Diospa qosqayki nisqanqa kaymin: Kay p'unchaykunapi jina jamusaj, Sara warmiykitaj uj qhari wawata nacichikonqa.

¹⁰ Manataj chayllachu, Rebecapis, wawasnimpis uj runallamanta mirayniyoj karqa, Isaac tatanchejmanta.

¹¹ Chay wawas manaraj nacerqankuchu, chayrayku mana ruwarqankurajchu allin kajta, nitaj mana allin kajtapis; Diospa munaynin ajllasqanman jina junt'akunampaj. Chaytaj mana runasraykuchu, astawanqa wajyajpa munayninrayku junt'akorqa.

¹² Payman nerqa: Kuraj kaj, sullk'a kajpa kamachisqanta ruwanqa, nispa.

¹³ Kay jina escribisqa kashan: Jacobta munakorqani, Esautataj chejnerqani.

¹⁴ Chantá ima nisuntajri? Diosqa manachu cheqanta ruwanman? Chayqa mana jinachu.

¹⁵ Moisesman nerqa: Khuyasaj pitachus khuyayta munani chayta. Pimantachus sonqoyta nanachikuni, chayta yanapasaj.

¹⁶ Ajinaqa Diospa wajyaynenqa mana pejpa munasqanman jinachu, nitaj pejpa kallpasqanman jinachu, manachayqa Diospa khuyakuyninman jina.

¹⁷ Escriturapi faraonman nerqa: Kaypajmin qantaqa sayaricherqayki, qampi atiyniyta rikuchinaypaj, sutiytaj tukuynej jallp'api willasqa kanampaj.

¹⁸ Ajinapeqa pitachus Dios khuyayta munan, chayta payqa khuyan. Pejpa sonqontachá rumiyachiyta munan, chayta rumiyachin.

¹⁹ Chantá niwankiman: Imaraykutaj Diosqa runata juchachanri? Pitaj Diospa munaynimpa contrampi kanmanri?

²⁰ Qanrí, runa, pitaj kanki Dioswan churanakunaykipaj? T'uru vasoqa ninmanchu ruwajninman: Imapaj ajinata ruwawarqanki, nispa?

²¹ Chayrí, t'uru vasota ruwajqa manachu atiyniyoj, chay kikin t'urullamantataj ruwanampaj, uj vasota allin qhawasqa kanampaj, ujtataj mana allimpaj?

²² Imaynatataj chantá Dios phiñakuyninta, atiynintapis rikuchiyta munaspa chay sajra runaswan pacienciakorqa, pikunachus wakichisqa kasharqanku wañuypaj chaykunawan.

²³ Ajinata ruwarqa janaj pachapi qhapaj kayninta rikuchinampaj, khuyakuyninmanta kajkunaman. Kaytaqa ñaupajmantaña wakicherqa janaj pacha k'anchaynimpi paykunapis kanankupaj.

²⁴ Chaykunata wajyallarqataj, niyta munani: Noqanchejta, chantá mana judiosllamantachu, manachayqa gentilesmantapis wajyallarqataj.

²⁵ Oseas libropipis nishan: Mana aylluy kajtapis aylluy kanki nisaj. Mana munakusqatapis munakusqay kanki nisaj.

²⁶ Chantapis qankunaqa mana aylluychu kankichej. Chayllapitaj nerqa: Kausashaj Diospa wawasnin nisqa kankichej, nispa.

²⁷ Israelitasmanta Isaías nerqa: Israelitaspa mirayninchus mar qochaj t'iyun jina kanman chaypis, chaykunamanta pisi puchojkunalla salvasqas kanqanku.

²⁸ Señor kay jallp'a patapi juzganqa cheqanta, usqhaytataj nisqanta junt'aspa.

²⁹ Isaiaspis ñaupajta nerqa: Ejercitospa Señorninchus mana mirayta saqewasunman karqa chayqa, Sodoma, Gomorra llajtas jina kasunman karqa.

Cheqan kajqa fenejta tarikun

³⁰ Chantá ima nisuntajri? Gentilesqa cheqan kajta mana mask'aspalla tarerqanku. Chayqa niyta munan cheqan kajqa fenejta tarikun.

³¹ Israelitas, cheqan leypa qhepanta rishaspapis, mana cheqan kajta tarerqankuchu.

³² Imarayku? Imaraykuchus paykunaqa leyta qhaterqanku mana fewanchu. Astawanqa leypa ruwanasninman jinalla. Chayrayku misk'ana rumipi misk'arqanku.

³³ Escribisqapi nisqanman jina: Kay Siompi churani misk'ana rumita, urmana qaqatawan. Paypi creejqa, mana p'enqaypi rikhurenqachu.