Romanos 8 - Qheshwa Biblia DC

Espiritupi kausana

¹ Kunanqa mana ima juchachaypis kanchu, Cristo Jesuspi kajkunapaj; [pikunachus mana purinkuchu aychaman jina, astawanqa Espirituman jina.]

² Kausachej Espíritoj leynenqa Cristo Jesuspi; juchaj kamachiyninmanta wañuymantawan kacharichiwan.

^3-4 Diosqa ruwarqa imatachus Moisespa leynin mana ruwayta atisqanta, aycha pisi kallpayoj kasqanrayku. Chayrayku Diosqa Churinta kachamorqa juchallikoj runaman rijch'akojta, jucha jawa; chay juchata aychapi chinkachinampaj; leypa cheqan kasqanqa noqanchejpi junt'akunampaj. Noqanchejqa mana aychaj munayninman jinachu purishanchej, astawanqa Espirituman jina.

⁵ Aychaman jina purejkunaqa, aychaj imasnillampi yuyanku. Espirituman jina yuyajkunarí, Espíritoj imasnimpi yuyanku.

⁶ Aychata kasoyqa wañuy; Espirituta kasuytaj kausay, sonqo tiyakuytaj.

⁷ Chayrayku aychaj sajra yuyaynenqa Diospa contrampi; imaraykuchus Diospa leyninwan mana kamachichikunchu, nitaj kasuyta atinchu.

⁸ Ajinamanta, aychaj munayninman jina kausajkunaqa, mana Diospa munanantachu ruwanku.

⁹ Qankunaqa mana aychaj munayninman jinachu kausankichej, astawanqa Espirituman jina, imaraykuchus Diospa Espíritun qankunapi kashan. Pipitajchus Cristoj Espíritun mana kanchu chayqa, mana Cristojtachu.

¹⁰ Sichus Cristo qankunapi kashan chayqa, cuerpoqa jucharayku wañusqapis kashajtin, espiritoqa kausan, cheqa kajrayku.

¹¹ Wañusqamanta Jesusta kausarichejpa Espiritunchus qankunapi kashan chayqa, pitachus Dios kausarichimorqa, chayllataj wañusqa ukhuykichejta kausarichimonqa, qankunapi kashan chay Espiritunejta.

¹² Ajinaqa, hermanos, manu kanchej mana aychamanchu, aychaj munayninman jina kausananchejpaj.

¹³ Aychaj munayninman jinachus kausankichej chayqa, wañunkichej. Chantá Espiritunejtachus aychaj ruwanasninta wañuchinkichej chayri, kausankichej.

¹⁴ Chayrayku pikunachus Diospa Espiritunnejta pusaykachasqas kajkunaqa, Diospa wawasnin kanku.

¹⁵ Mana kamachipi kanapajchu Espiritutaqa jap'erqankichej, ujtawan mancharisqallapuni kanaykichejpaj, astawanqa chay Espirituta jap'erqankichej Diospa wawasnimpaj rejsisqas kanaykichejpaj. Chayrayku Diosmanta mañakuychej: Tatáy, Tatáy, nispa.

¹⁶ Chay kikin Diospa Espiritullantaj, espiritunchejwan willanku Diospa wawasnin kasqanchejta.

¹⁷ Paypa wawasnin kanchej chayqa, chayaqeyoj kanchej. Diosmanta chayaqeyojña kaspataj, Cristowan khuska chayaketa jap'isunchej. Imaynatachus Cristowan khuska ñak'arinchej chayqa, paywan khuskallataj janaj pacha k'anchaypi wiñaypaj kasunchej.

¹⁸ Cheqamanta kay p'unchaypi ñak'ariykunaqa, noqapaj mana imachu, nitaj kikinchakuyta atinkumanchu, chay janaj pacha jamoj k'anchaywan, chaytaj noqanchejpi rikuchikonqa.

¹⁹ Mundontin anchatapuni suyashan Diospa wawasnin k'anchaypi rikuchisqas kanankuta.

²⁰ Chayrayku mundopi qhasillapaj churasqa karqa, mana chay mundoj munaqanraykuchu. Astawanqa Diosllataj suyayta qorqa munasyninrayku.

²¹ Mundopis ismuypa kamachiyninmanta kacharisqa kanqa, Diospa kacharisqa wawasninwan k'anchaypi kanampaj.

²² Yachanchej jina kunankama Diospa ruwasqan waqan, ñak'arintaj, uj onqoj warmi jina.

²³ Chantá mana chayllachu, astawanqa Espiritojta ñaupaj kaj regalosninta japejkuna, sonqonchejpi waqanchej, suyaspa Diospa wawasnimpaj rejsisqa kayta munaspa, ukhunchejpis kacharisqa kananta.

²⁴ Suyasqanchejrayku salvasqas kanchej; chantá rikukoj suyayqa manaña suyaychu. Pillapis rikunña chayqa, imapajñataj suyanqari?

²⁵ Imatachus mana rikusqanchejta suyanchej chayqa, pacienciawan chaytaqa suyananchej tiyan.

²⁶ Ajinallatataj Espiritupis yanapawanchej pisi kallpa kayninchejpi. Noqanchejqa imatachus maychus kasqanman jina mañakunanchejtaqa mana yachanchejchu. Kikin Espiritupis noqanchejpaj mana niy atina palabraswan ayqhospa mañapuwanchej.

²⁷ Dios sonqosta rejsejqa, yachan imachus Espíritoj yuyaynin kasqanta. Santo Espiritoqa, Diospa munayninman jina ajllasqasnimpaj mañapun.

Atipajkunamantapis astawan

²⁸ Yachanchej, Diosta munakojkunataqa tukuy ima allimpaj yanapasqanta, paypa munayninman jina wajyasqasta.

²⁹ Pikunatachus Dios ñaupajmantapacha rejserqa chaykunata, qallariypi ajllarqa Churinman rijch'akunankupaj; ajinapi Churenqa ashkha hermanos ukhupi kuraj kaj kanampaj.

³⁰ Pikunatachus qallariypi ajllarqa chaykunatapis wajyallarqataj. Chay wajyasqastataj cheqan runaspaj rejserqa, ajinata rejsispataj paykunaman janaj pacha k'anchayta qorqa.

³¹ Ima nisuntaj kaymantari? Sichus Dios noqanchejwan kashan chayqa, pitaj contranchejpi kanmanri?

³² Diosqa uj k'ata Churinta mana mich'akuspa qorqa tukuyninchejrayku wañunampaj. Chantá, imaraykutaj mana qowasunmanchu Churinwan khuska tukuy imata?

³³ Pitaj Diospa ajllasqasninta ch'ataykunmanri? Dioslla mana juchayojta rikhurichin.

³⁴ Pitaj juchachanmanri? Chaypajqa Cristo wañorqaña, wañusqasmantapis kausarimorqa; kunantaj Diospa pañampi kashan noqanchejpaj mañaspa.

³⁵ Pitaj Cristoj munakuyninmanta t'aqawasunri? Ñak'ariychu, llakiychu, qhatiykachasqa kaychu, yarqhaychu, p'acha pisi kaychu, wañuywan khuska kaychu, chayrí espadachu?

³⁶ Escribisqapi nisqanman jina: Qanrayku tuta p'unchay wañusqas jina kayku, yupasqastaj ñak'ana ovejas jina.

³⁷ Chayrayku kay tukuy imaspi, cheqatapuni atipajkuna kanchej, munakuwajninchejrayku.

^38-39 Achayrayku mana pipis Diospa munakuyninmanta t'aqawasunmanchu, ni wañuypis, ni kausaypis, ni angelespis, ni kurajkunapis, ni atiyniyojkunapis, ni kaypi kajpis, ni jamoj kajpis, ni patamanta kajpis, ni ukhumanta kajpis, nitaj ima waj ruwasqa kajpis. Chay Diospa munakuynenqa Cristo Jesús Señorninchejpi kashan.