Romanos 7 - Qheshwa Biblia DC

Leymanta t'aqasqasña kanchej

¹ Manachu yachankichej hermanos, leyta rejsejkunaman parlani, leyqa atiyniyoj kasqanta kamachinampaj runa kausanankamalla?

² Qosayoj warmeqa, qosan kausanankamalla, leynejta qosampa kamachiynimpi kanan tiyan. Qosan wañupojtinrí, leynejllatataj manaña qosampa kamachiynimpichu.

³ Chayrayku sichus qosan kausashajtin waj qhariwantaj tantakun chayqa, chay warmeqa qhenchachakun. Qosan wañupojtinrí, leynejta manaña qosampa kamachiynimpichu. Chaynejta waj qhariwan casaraspaqa mana qhenchachakunchu.

⁴ Ajinallatataj qankunapis, hermanosníy, leypaj wañorqankichej, Cristo wañusqannejta, wajpataña kanaykichejpaj, pichus wañusqakunamanta kausarichimorqa chaypata; Diospajtaj allin imasta ruwananchejpaj.

⁵ Cheqamanta aychanchejpi kashaspaqa, juchaj munaynin leynejta ukhunchejpi karqa, chaytaj wañuyman apaj.

⁶ Ñaupajta leypa kamachiynimpi karqanchej, kunanrí, leymanta t'aqasqasña kanchej, imaraykuchus leypajqa wañorqanchejña. Chayrayku Espiritunejta Diospa mosoj kamachinta kasuna, amaña ñaupa leypa nisqantaqa.

Leynejta juchata rejsinchej

⁷ Chantá, ima nisuntajri? Leyqa juchachu? Chayqa mana juchachu. Noqaqa mana imaynamantapis juchata rejsiymanchu karqa mana ley kajtenqa; manallataj rejsiymanchu karqa imachus munapayay kasqantapis, manachus ley ninman karqa, ama munapayankichu, nispa chayqa.

⁸ Jucharí leynejta noqapi churasqa, tukuy imaymana munapayaytaj, imaraykuchus ley mana kajtenqa juchaqa wañusqamin.

⁹ Uj p'unchaypi kausarqani mana leyllawan; ley jamojtinrí, juchaqa kausarerqa, noqataj wañorqani.

¹⁰ Chay kikin leytaj kausaypaj karqa, noqapajtajrí wañuyta apamorqa.

¹¹ Juchaqa leynejta ch'aukiyawarqa, chay leynejtataj wañuchiwarqa.

¹² Cheqamanta leyqa llimphu, kamachiypis llimphu, cheqan, k'achataj.

¹³ Chantá, chay allin kaj leychu churasqa karqa noqa wañunaypaj? Chayqa mana jinachu; manachayqa jucha kasqanta rikuchinawampaj noqata wañuchiwarqa allin kajnejta. Jinamanta juchaqa leynejta manchay sajra juchallikojpuni kasqanta rikuchikorqa.

¹⁴ Yachanchej, leyqa Espirituman jina churasqa kasqanta; noqarí aychamanta kaspa, juchaman qosqa kani.

¹⁵ Imatachus ruwasqayta mana yachanichu; chayrayku mana ruwanichu imatachus munasqayta. Astawanqa imatachus chejnini, chayta ruwani.

¹⁶ Imatachus mana munanichu chayta ruwani. Chayrayku yachani chay ley allin kasqanta.

¹⁷ Jinamantaqa manaña noqachu chaykunata ruwani, astawanqa noqapi kashan chay jucha, chaytaqa ruwan.

¹⁸ Yachani ari cheqa kaj mana noqapi kasqanta, chay niyta munan aychaypi. Cheqa kajta ruwayta munayqa noqapi kashan, manataj atinichu.

¹⁹ Allin kajta ruwayta munasqaytaqa, mana ruwanichu, astawanqa sajra kajta mana munasqaytaraj ruwani.

²⁰ Imatachus mana munasqayta ruwani chayqa, manaña noqachu ruwani; astawanqa noqapi kashan chay jucha, chaytaqa ruwan.

²¹ Ajinapeqa allin kajta ruwayta munaspa, kay leyta tarini, sajra kajqa noqapi kasqanta.

²² Sonqoypeqa Diospa leynimpi kusikuni.

²³ Chantá waj leyta cuerpoypi rikuni, chaytaj sonqoypa contrampi kashan; presochasqatataj juchaj leyninman pusawan, mayqenchus ukhuypi kashan, chayman.

^24-25 Way, noqamanta! Pitaj kay wañoj cuerpoymanta kacharichiwanqari? Dioslla, pitachus graciasta qoni Señorninchej Jesucristonejta. Ajinamantaqa, yuyayniywan Diospa leyninta kasuni, aychaywantaj juchaj leyninta.