Romanos 5 - Qheshwa Biblia DC

Diospa cheqan runapaj rejsisqasnimpa rikuchiynin

¹ Fenejta salvasqas kaspa, Dioswan allinyachisqas kanchej, Señorninchej Jesucristonejta.

² Paynejta yaykuyta atinchej chay salvacionman creesqanchejrayku, chaypitaj sinch'ita sayanchej, kusikunchejtaj, Diospa janaj pacha k'anchayninta suyaspa.

³ Mana chayllachu, astawanqa kusikullanchejtaj llakiykunapi yachaspa llakiykunaqa pacienciata qowasqanchejta.

⁴ Pacienciaqa allin kasqanchejta yachachiwanchej, chaytajrí suyakuyta qowanchej.

⁵ Suyakoyqa mana p'enqachikunchu, imaraykuchus Diospa munakuynenqa sonqonchejpi churasqa kashan, Santo Espiritunejta, mayqentachus Dios qowarqanchej.

⁶ Pisi kallpayojllaraj kashajtinchej, maychus tiempompi Cristo wañorqa juchasapasrayku.

⁷ Cheqamanta mana pipis wañunmanchu pi runaraykullapis; ichapis atinman wañuyta uj allin runarayku.

⁸ Chay tukuywampis Dios munakuyninta rikuchiwanchej, juchasapasllaraj kashajtinchej, Cristoqa wañorqaña noqanchejrayku.

⁹ Kunanqa astawanraj qowasun, yawarninrayku Dioswan allinyasqaña kajtinchej, paynejtataj k'ajaj phiñakuymanta salvasqas kasunchej.

¹⁰ Diospa contrampi kashaspa, Dioswan allinyakorqanchej, Churimpa wañuyninnejta. Astawanraj ari allinyasqaña kaspaqa, salvasqas kasunchej kausasqanrayku.

¹¹ Mana kayllachu, astawanqa Diospi kusikullanchejtaj, Señorninchej Jesucristonejta, pay Dioswan allinyachiwasqanchejrayku.

Adannejta jucha jamorqa, Cristonejtataj salvación

¹² Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runakunapaj karqa, tukuyninku juchallikusqankurayku.

¹³ Manaraj ley kashajtin, ñapis jucha kay pachapi karqaña; maypichus ley mana kanchu chayqa, juchaqa, manaña juchachu.

¹⁴ Chaywampis wañoyqa atiyniyoj karqa Adanmanta Moiseskama. Ajinallataj wañoyqa karqa, mana Adán jina juchallikojkunapajpis. Adanqa chay jamojpa rijch'aynillan karqa.

¹⁵ Diospa qowasqanchej regaloqa mana jucha jinachu. Sichus uj runaj juchanrayku, ashkhas wañorqanku chayqa, astawanraj ashkhaspaj Diospa khuyakuynenqa, regalontaj yapakorqa, uj runaj khuyakuyninrayku. Chaytaj Jesucristo karqa, qhasilla, tukuypajtaj.

¹⁶ Diospa qowasqanchej regaloqa, mana chay uj runaj juchallikusqan jinachu. Cheqamanta juicioqa jamun, uj k'ata jucharayku wañuypaj, salvaciontajrí, ashkha juchasrayku jamorqa mana juchayoj kanapaj.

¹⁷ Sichus uj runaj juchanrayku wañuy atiyniyoj karqa chayqa, aswan atiyniyojraj kanqanku mosoj kausaypi Jesucristonejta, pikunachus qhasimanta jatun salvacionta jap'inku, cheqan kaypa regalontawan.

¹⁸ Ajinata Adanraykulla jucha jamorqa, tukuy runa juchachasqa kanampaj. Ajinallataj Jesucristonejta cheqan kasqanrayku tukuy runapaj cheqan kausay jamorqa.

¹⁹ Uj runa mana kasukusqanrayku tukuy runakuna juchallikorqanku. Ajinallatataj uj runa kasukusqanrayku, ashkhas cheqan runaspaj qhawasqas karqanku.

²⁰ Leyqa churasqa karqa, astawan jucha yapakunampaj. Juchastawan yapakojtinrí, Diospa khuyakuynimpis astawanraj yapakorqa.

²¹ Chayqa karqa imaynatachus jucha atiyniyoj karqa wañuy kanampaj, ajinallatataj Diospa khuyakuynimpis atiyniyoj kanqa, cheqan kajnejta wiñay kausaypaj Señorninchej Jesucristonejta.